Mi 1,398 tàn theihna tura buatsaih Jail 10-ah mi 1,739 an awm mek

June 5, 2025 dinhmun angin Mizorama jail 10-ah táng 1,722 leh an nute tàn vanga jail-a awm ve naupang 17 an awm a, an vaiin mi 1,739 an ni. Jail 10-te hi mi 1,386 tàn theihna tura buatsaih ni mah se, naupang tel loa táng zat hi ruahman zat aiin 336-in an tam zawk.

Mizorama jail 10-te hi mipa 1,130 leh hmeichhia 256 tàn theihna tura buatsaih a ni a, a vaiin 1,386 a ni. June 5 dinhmunah chuan mipa 1,526 leh hmeichhia 196 an táng a, mipa táng mek hi ruahman zat aiin 396-in an tam zawk. Hmeichhia tángte erawh chuan hmun an luah khat lo thung.

June 5 dinhmun angin, jail 10-a táng zingah dam chhunga táng tura hrem mi 56 leh hrehawm taka táng tura hrem mi 378 an awm a; tàn pangngaia táng tura hrem mi 192 leh an chungthu ngaihtuah lai mi 1,096 an awm.

Jail 10 zingah mipa hlang tànna Central Jail, Aizawl chu táng thei tur zat bituk aia táng tam berna a ni a; mi 438 tàn theihna tura buatsaih a nih laiin, mi 835 an táng a, bituk aia táng mek zat tamna 397 niin, 90.64% a tling. Lawngtlai District Jail chu jail thâwl ber a ni a, mi 98 tàn theihna tura ruahmanah mi 38 (38.78%) an tâng.

Central Women Jail chu hmeichhia 96 tàn theihna tura siam ni mah se, mi 128 an tâng a, an nute tàn vanga jail-a awm ve naupang 10 an awm bawk. Naupangte chhiar telin bituk aia an tamna chu 42 a ni.

Central Women Jail-ah an nute tàn vanga jail-a awm ve naupang 10 an awm a, Champhai District Jail-ah naupang panga, Kolasib leh Mamit district jail-ah naupang pakhat ve ve an awm.

Aizawl District Jail, Lunglei District Jail leh Champhai District Jail-te pawh táng thei tur zat bituk aia tam táng an awm. Mi 90 tàn theihna tura ruahman Aizawl District Jail-ah mi 106 tángin, mi 109 lenna Lunglei District Jail-ah mi 122 an táng a; mi 105 tàn theihna tura ruahman Champhai District Jail-ah tang thei zat let aia tam mi 216 an táng bawk.

Siaha, Lawngtlai, Kolasib, Serchhip leh Mamit district jail-ahte erawh chuan tâng thei zat bituk hnawhkhah a ni lo a; heng jail panga hi mi 548 tàn theihna tura ruahman niin, mi 322 an tâng a ni.