KHAWTHLIR

Thisen pe

June 7, Inrinni khan YMA, Venghnuai Branch-in ZMCH tan thisen unit 56 an pe a, petute mipa 44 leh hmeichhia 12 an ni a; YMA Tuikhuahtlang Branch pawhin Synod Hospital tan unit 36 an pe a, petute mipa 32 leh hmeichhia pali an ni. Inrinni vek khan Lungleia Roman Catholic kohhran Secred Heart of Jesus Parish chuan Lunglei Civil Hospital tan thisen unit 10 an pe bawk.

Lawnglêng hlan

Disaster Management & Rehabilitation director R Vanrengpuia chuan tun hnai khan fûr laia Khawthlangtuipui lianin Tlabung leh a chhehvela harsatna a thlen ṭhinte chhâwk zângkhai nan Tlabung SDO (Civil) Moses Lalfakawma Tlau hnenah khawl hmang lawngléng (inflatable boat - engine powered) a hlan.

Pentikos Ni hmang

Nimin Pathianni kha Pentikos Ni a ni a, Mizorama Kohhran hrang hrangte chuan Pentikos Ni pual hian hun an hmang a; kohhran ṭhenkhat chuan thupui thlan neiin thuchah an ngaithla a, ruai leh thingpui ruaite nena hun hmang pawh an awm. Pentecost tih awmzia chu 50-na tihna a ni a; Thuthlung Hlui-ah chuan Kalhlên Kût ṭiah ni aṭanga ni 5-naah an hmang ṭhin a, Thuthlung Thar hunah chuan Isua thawh leh tûk (Easter) aṭanga ni 50-naah hman a ni.

Thing ṭiak phun

Green Bethlehem Vengthlang chuan an din champha vawi sarihna pualin June 7, Inrinni khan an veng aṭanga Chite panna kawng sir leh an veng hmun âwl remchang laiah thing ṭiak 120 vel an phun. Green BVT hian kum tin an din champha leh thing phun hun laiin thing an phun ṭhin a, an enkawl zui ṭhin bawk.

MLA-in hmanpui

MZP Sub-Headquarters, Kawnpui leh Thingdawl chuan June 6, 2025 khan kumina HSLC leh HSSLC-a hlawhtling tharte chawimawina hun an buatsaih a, bialtu MLA K Laldawngliana'n hmanpuiin, zirlaite chu an zir lai dah pawimawh a, ruihhlo laka fihlim tur leh mobile phone leh social media khawih chintâwk nei turin a chah.