Lungleiah raltlante tan dawr siam phal loh

Lunglei Municipal Council (LMC) Board of Councillors (BoC) chu June 6, 2025 khan an chairman Lalzuithanga kaihhruaiin BoC meeting hall-ah an ṭhu a; dan angin LMC chhungah phalna nei loa sumdawn te, raltlante tan dawr siam leh khawlaia thil zawrh kual khap a nih thu tarlan a ni.

Ṭhutkhawmah hian The Lunglei Municipal Council Licensing Regulations, 2024-in a sawi angin, LMC huam chhungah phalna nei loa sumdawn khap a ni a; ráltlânte chu dan hnuaiah dawr siam/luah leh khawlaia sumdawnna kalpui tura phalna pek theih zingah an tel loh avangin raltlante tan sumdawn khap a nih thu an tarlang.

LMC BoC ṭhutkhawmah hian sumdawngte venhimna leh kaihhruaina, The Mizoram Street Vendors (Protection of Livelihood and Street Vending) Regulations, 2017 chu LMC huam chhungah hman turin an pawm a ni.

Dan an pawm takte hmanga fel taka hmalakna an rêl a, a ṭul anga bawhzui turin LMC chief executive officer (CEO) Donny Lalruatsanga an ruat.

LMC Executive Council-in 'Lunglei Day' hman chungchanga rawtna an thlen chu an ngaihtuah a, NGO hrang hrangte leh Lunglei khawpui chhunga ràwn àwm deuhte nen zau zawka sawihona (consultation meeting) buatsaih hmasak phawt ni se, an ti.

LMC-in kum 2024-25 chhunga parking fee a hmuh Rs 18,31,349 aṭanga BoC-in hmanna tur a ruahman sa Rs 4,86,275 bâk zawng Rs 23,17,624 chu tui luankawr khuhna ṭha lo siamṭhatna atan te, kawng leh kawng sir kea kalna daidanna pal (railing) rawng hnawihna atan te, kawng kual laia darthalang (convex mirror) dahna atan te, kawng cheina leh tilang fiahtu êng (reflector/road stud light) vuahna atante hman an rel bawk.