Loneitute thlai enkawl dan zirtir

Agriculture, Horticulture, AH & Veterinary, Soil, Sericulture leh Fisheries department official-te bakah Krishi Vigyan Kendra (KVK) mithiamte chuan Viksit Krishi Sankalp Abhiyan hnuaiah district chhunga khaw paruk an tlawh a, thlai enkawl chungchang an zirtir.

Viksit Krishi Sankalp Abhiyan (VKSA) hi India rama fûr thlai chìn hun (Kharif season) thleng tura inbuatsaihna atana kut hnathawktute an khuaa kal chilha thil pawimawh hrilfiahna a ni a, Lunglei district-ah June 5, 2025 khan kalpui ṭan a ni.

Lunglei district VKSA team hian June 5 khan Lunglei District Agriculture Office kawt aṭangin khaw paruk - Vanhne, Serte, Sertlangpui, Ṭhuampui, Bualte leh South Lungdai an pan a; he'ng khuaa kut hnathawktu mi 702-te chu thil pawimawhte an zirtir.

Loneitute chu an thawh chhuah leh thar chhuah tipung tur leh an thawh chhuah aṭanga hlâwkna tam zawk an tèl theihna tura tunlai thiamna hrang hrang an hman ṭangkai theih dan tur te, thlai chi ṭha leh loneih dan ṭha leh sorkarin kut hnathawktute tana hamṭhatna hrang hrang a duante hman ṭangkai dan an zirtir a ni.

VKSA campaign hi May 29, 2025 khan India ramah kalpui ṭan a ni a, Mizoramah pawh district hrang hrangin an kalpui mek. Hmanrua leh thiamna changkang zawk hmanga loneitute puihna tura hmalakna a ni a, June 12, 2025 thleng kalpui tur a ni. India rama distirict 700-a khaw 65,000 tuam tura ruahman niin, loneitu mi nuai 150 tlawh chhuah tum a ni.