Kau Tlabung leh Tuipanglui thubuaiah Thil dik lo tia puhte'n thiam an chang

Kau Tlabung Mini Hydel Project leh Tuipanglui Mini Hydel Project chungchanga thubuai awmah Special Judge (PC Act) Lucy Lalrinthari chuan nimin khan thutlukna a puang a, thil ti dik loa tia puhte'n thiam an chang.

Kau Tlabung MHP leh Tuipanglui MHP hi October 25-27, 2016 chhung khan Special Court chuan a ngaihtuah a, nimin khan thutlukna a tichhuak. Court chuan, thubuai chhuitute'n finfiahna an neih loh thu tarlangin, 'Hetianga thil dik lo finfiahna awm loa Court-a thil ngaihtuah hi hun khawralna mai a ni' a ti. Court chuan prosecution lamin finfiahna an nei loa a hriat avangin witness pawh koh ngai ti loin thubuai a tihtawp a ni.

He thubuaiah hian project pahnih thawh a nih laia PWD chief engineer Liansanga chu a thuneihna hmang sual a, contract thawh dan tura ruahman sa tidanglam a, contractor hlâwkna tura thil tia puh a ni. Project thawh a nih laia P&E superintending engineer Lalnunmawia Sailo, SDO Laldawngliana leh supplier Swopan Kumar Roy-te chu wire-mesh hlûm (roll) 66 man pek chhuah si, a tak hmuh tur awm lo chungchangah thubuai siam sak an ni thung.

Liansanga ukil chuan, Liansanga an puhna chu a thuneihnain a tih theih bak thil a nih thu Court-ah a sawi a, "Contract kalphung tihdanglam hi PWD CE thuneihna piah lam a ni. Sorkar pawmpuina tel lo chuan tihdanglam theih a ni lo," a ti.

Lalnunmawia Sailo, Laldawngliana leh Swopan Kumar Roy-te ukil chuan wire-mesh hlûm 66 chu hydel project-ah hman ngei niin Court a hrilh a; wire-mesh hmanga hydel project an hungna thlalak an thehluh bakah, wire-mesh hmanga hydel project hung hna thawktu mi pahnih chu Court-ah an hruai a ni.

Kau-Tlabung MHP leh Tuipanglui MHP thubuai chhuitu Anti Corruption Bureau (ACB) chuan February 2016 khan an chhuina report (chargesheet) chu Court-ah an thehlut. Chargesheet-ah hian a têra thubuaia hming lang, PWD leh P&E department-a engineer 15 chu an hming tarlan a ni tawh lo a; an inrawlhna chiang taka hmuh theih a nih loh vanga thubuai siamsak zui an nih tawh loh thu tarlan a ni.

Kau-Tlabung MHP leh Tuipanglui MHP siamnaah sum tihchingpen a awma hriat vangin PRISM chuan October 3, 2008-ah ACB-ah FIR an thehlut. ACB chhuina aṭangin May 13, 2010-ah Kau-Tlabung kaihhnawihah PWD leh Power & Electricity engineer pariat leh Tuipanglui kaihnawiah engineer pakua thubuai siamsak tura tih an ni.

July 2, 2010-ah Mizoram sorkarin ACB chu thubuai hnûkdâwk turin a hriattir a; chuvang chuan PRISM chuan Gauhati High Court, Aizawl Bench-ah August 25, 2010-ah PIL an file a ni. PIL chu February 15, 2011-ah High Court-in a pawm a, Principal Bench, Guwahati-a ngaihtuah turin a dah.

High Court chuan March 17, 2015-ah Chief Justice (acting) PK Saikia chuan thuremna a tichhuak a, thuremna chhuah aṭanga thla ruk ral hmaa engineer-te lakah Special Court-a eiruk thubuai thehlut turin ACB thu a pe a ni.

High Court thutlukna chu Mizoram sorkarin Supreme Court-ah a khinglet a, sorkar petition thehluh chu Supreme Court-in May 11, 2015-ah a ngaihtuah a, mahse Supreme Court chuan Mizoram sorkar petition chu a hnâwl a ni.