CM-in Thenzawlah Tribal Hostel leh AYUSH Hospital a hawng

Chief minister Lal Thanhawla chuan nimin khan Thenzawlah AYUSH Hospital leh Tribal Hostel a hawng.

Lal Thanhawla chuan, Mizo Kristiante zinga cancer leh HIV hrik pai an tam lutuk te, zûk leh hmuama Mizote an fihlim lo lutukte chu thil zahthlak a nih thu a sawi a, "Rinawmna, dikna leh taimakna kan ramin a tlakchham ber hi nei tura inruahman a ṭul a ni," tiin, hnathawhnaah Pathian ringtu nihna lang se a duh thu a sawi.

Chief Minister chuan, tun hnaiah doctor-te'n private clinic-ah MRI ti turin an thawn (refer) tih sawiin, Mizoramah sorkarin x-ray, MRI leh CT scan tihna ṭha a nei lo chu a tlawmngaih thu leh, private clinic-in hman-raw ṭha zawk nei a, sorkar zawkin a nei lo chu tlawmngaihthlak a tih thu a sawi a, "Sorkar hnathawk lian, secretary-te'n ṭan an lak a ṭul a ni," a ti.

Mizoramin AYUSH Hospital ṭha tak a nei ta chu lawmawm a tih thu sawiin, Lal Thanhawla chuan, "India ramah AYUSH Hospital hi mirethei zawkte ban phak a nih avangin hetiang kan nei hi a lawmawm a, mipuite'n tangkai taka an hman ka beisei," a ti. Damdawi-in chu neitu rilru pûa hmang tura damlo leh mipuite a chah rualin, thawktute chu mi lian leh mite, hausa leh rethei thliar lo a, ang khat veka en turin a chah.

Chief Minister chuan, Thenzawlah golf course siam a ni dawn tih sawiin, kum 2018-ah siam zawh beisei a nih thu a sawi a; a siam nan cheng vbc. 74 vel ruahman a nih thu a sawi bawk.

AYUSH Hospital hi khum 50 awmna tura sak niin, chenng nuai 554 chuang senga sak a ni a, January 4, 2012-ah CM Lal Thanhawla'n a sakna tur lungphùm a lo phúm tawh a ni.

Hawnna inkhawm hi damdawi-in tualah neih a ni a, Health secretary Lalrinliana Fanai-in a kaihruai. Chief Minister bakah, khualzahawm Health minister Lal Thanzara, Social Welfare minister PC Lalthanliana, parliamentary secretary TT Zothansanga leh Thenzawl khawtlang aiawhte'n thu an sawi.

AYUSH Hospital hi hawn a nih hmain, August 1, 2016 aṭangin Out Patient Department (OPD)-ah inentirna hun hawn
ṭan a ni a, OPD hawn a nih aṭanga nimin thleng khan mi 4,556 an inentir tawh a, ni tin mi 56.95 inentir ziah ang a ni. Damlo pasarih admit an ni tawh a, mitthi pakhat a awm tawh bawk. Damdawi-in hi hawn a nih dawn avangin OPD bik chu October 20 aṭangin khâr rih a ni.

Tribal Hostel hi Ministry of Tribal Affairs
aṭanga sum hmuh cheng nuai 359.83 hmanga sak a ni a, building chhawm thumah khum 75 a awm. Kum 2013 aṭanga sak
ṭan a ni.