Kum 2015-16 chhungin artui nuai 391 thar

AH&Vety department buatsaih, Integrated Sample Survey (ISS)-in a tarlan danin, kum 2015-16 chhung khan Mizoramin artui nuai 391 a thar chhuak a, sa chi hrang hrang ton 13,512 thar chhuah a ni bawk.

AH&Vety department chuan nimin khan ni hnih awh turin ISS chungchang zirhona an buatsaih a, department officer-te an tel. He hunah hian AH&Vety department hnuaia thil thar chhuah hrang hrangte leh ISS-in a tarlante zirho a ni. Training hi AH&Vety joint director Dr Daniel Chianghnuna'n a kaihruai.

Integrated Sample Survey hi sorkar laipui hnuaia kalpui niin, Mizoramah chuan kum 1985-ah ṭan a ni a; kum khat hi season thum-ah ṭhenin, district hrang hranga khaw thlan chhuahah bawnghnute, artui leh sa talh zatte an zir chiang ṭhin.

ISS tarlan danin, kum 2015-16 chhunga Mizorama bawnghnute thar chhuah zat chu ton 21,997 a ni. Indian Concil of Medical & Research (ICMR)-in mihring hriselna atana mi pakhatin bawnghnute a mamawh zata a ngaih chu ni khatah gram 240 a nih laiin, Mizoramin a thar chhuah aṭanga chhûtin mi pakhatin ni khatah gram 50 zel an chang ang a ni.

Kum 2015-16 chhung vêkin Mizoramin artui a thar zat chu nuai 391 a ni a, Mizorama mi pakhatin kum khatah artui 33 vel ṭheuh an chang ang a ni. Hetih lai hian, ICMR-in mihring hriselna atan artui a mamawh zat a chhût chu kum khatah 180 a ni thung.

Sa a thar chhuah zat chu ton 13,512 a ni a, mi pakhat tan kum khatah kg. 11.28 zel a awm ang a ni. ICMR-in kum khata mi pakhatin sa a mamawh zata a chhût chu kg. 12.41 a ni. Mizoramin kum 2015-16 chhunga bawnghnute, artui leh sa a thar chhuah zawng zawng hlut záwng chu cheng vbc. 523.02 a tling.

ISS zirhonaah hian AH&Vety director Dr Saingura Sailo chuan, mahni hna ṭha tak leh tui taka thawk thei turin training neih a, intuaithar fo a ngai tih a sawi a, "Sorkar a fimkhur tulh tulh a, eng project pawh siam dawn ila statistical data rintlak kan neih a ngai a ni," a ti.