Election Observer-in Kolasib leh Serchhip district an tlawh

Nimin khan Kolasib leh Serchhip chu an district tana Election Observer-a ruatte'n an tlawh a; sorkar official-te thil pawimawh hrang hrang an sawipui.

Kolasib district tana election observer Rodney L Ralte chuan DC conference hall-ah official-te a kâwm a; inthlan chu sorkar laipuiin a ngaih pawimawh berte zinga a mi a nih thu sawiin, "Engmah tih dik lo awm loa inthlanna thianghlim leh felfai awmtir hi sorkar laipui tum a ni," a ti.

Kolasib DC H Lalengmawia kaihhruaiin Rodney L Ralte hian hearing an neihna hmun, Kolasib Venglai V/C House a tlawh nghal a ni.

Serchhip district tana election observer Zothankhuma pawhin Serchhip DC committee room-ah electoral registration officer leh assistant electoral registration officer-te a kâwm a, an hnathawh mekte a enpui.

Zothankhuma chuan, Serchhipa special summary revision buaipuitute chu an hnathawh chin leh hmabakte hre chiang leh an hnaa inpe zo tak nia a hriat thu a sawi a, "Tun thlenga in hnathawh chin a felfaiin hmuh a nuam hle a ni," a ti.