Mumbai-ah Covid-19 vei Mizo hmuh belh Mizo pasarihin Covid-19 an kai tawh

Mumbai Mizoram House-a cancer vei mek pahnih, damlo awmpuitu pakhat leh House-a thawk hnam dang pakhatte'n Covid-19 an kai tih nimin zing khan hmuh chhuah leh a ni. Mumbai-ah hian Covid-19 kai Mizo pasarih hmuh chhuah a ni tawh.

Mumbai aṭanga Vanglaini thu dawn danin, Mumbai Mizoram House-a awm Mizo nu pakhatin Covid-19 a kai tih April 13-a hmuh chhuah a nih hnuah April 14 khan House-a damlo awmte leh anmahni awmpuitute chu endik an ni a, mi pathumin Covid-19 an kai tih hmuh a ni. 

April 14-a endik ve lohte chu April 18 khan (house-a thawkte telin) mi 35 endik leh a ni a, hripui an kai loa hmuh a ni.

April 14-a sample test ṭuma negative mi 17 bakah, House-a thawk hnam dang la test ve lohte chu April 19 khan endik leh an ni a; nimin khan result chhuakin, damlo pahnih, anmahni awmpuitu pakhat leh hnam dang pakhatin Covid-19 an kai tih hmuh chhuah a ni leh ta a ni.

Health minister Dr R Lal­thangliana chuan Mumbai-a thil thleng chungchang hi nimina Secretariat conference hall-a official-te nen an ṭhutkhawmnaah sawiin, "Maharastra sorkarin rang taka hma la nghalin, cancer vei Covid-19 vei pahnihte chu Covid-19 veite enkawlna tur bika siam Seven Hills Hospital-ah dah nghal an ni a, mi dang pahnih erawh chu quarantine facility-ah dah an ni," a ti a; Covid-19 kaite chuan enkawlna ṭha tak an dawn ngei tur thu a sawi.

Covid-19 chu natna tharlám,  hriatthiam har tak a ni tih sawiin R Lalthangliana chuan, "Sample test negative, a hnua test nawn leha positive hmuh chhuah leh ang chi ‘false negative’ hi hmun tam takah hmuh a lo ni tawh," a ti. Covid-19 veite hming, thlalak leh nihna reng reng social media leh thil danga puangzar lo turin mipui a ngen.

Mumbai aṭanga thu dawn danin, Mumbai-a Mizo awm mek zinga Covid-19 kai hmuh chhuahte hian harsatna an nei rih lo (symptom a lang rih lo) a, an dahna damdawi-ina thawk zingah Mizo hnathawktu an awm ve zel avangin thil tih a awlsam phah hle a ni.