KHAWTHLIR

Nimin khan pawl hrang hrangin thisen an pe. LIKBK Ṭhalai Pawl, Lawngtlai College Veng Bialin thisen unit 40 an pe, petute mipa 38 leh hmeichhia pahnih an ni. Chanmari Branch KṬP-in Synod Hospital-ah unit 22 an pe a, petute mipa 19 leh hmeichhia pathum an ni. Ser­chhip Kawnpui Branch KṬP-in Serchhipah unit 18 pein, petute mipa 14 leh hmeichhia pali an ni a; Baptist HSS NSS volunteer mipa pakua leh hmeichhia pariatte'n Christian Hospital, Serkawnah unit 17 an pe. Kolasib Venglai Branch YMA Khuangchera Section-in unit 12 pein, petute mipa 10 leh hmeichhia pahnih an ni. AYF Champhai South Bial member mipa 12 leh hmeichhia pathumte'n unit 15 an pe bawk.

ZPM party hruaitu 

ṭhenkhatte chuan April 20, Thawhṭanni khan April 18 tlaia thli tlehin Sesawng khuaa in leh lo a tihchhiatte an tlawh a, Sesawnga YMA branch pathumte hnenah a ṭula hman turin pawisa an hlan. Sesawng khaw­tlang hruaitute sawi danin, an khuaah hian thlipuiin in 72 a tichhia a, chu'ng zinga pakua chu luah zui theih loh tur, a thar hlaka sak ngai a ni.

CM Relief Fund-ah hian nimin khan tlai dar 3 thlengin mimal/pawl/department 10 aṭangin Rs. 36,47,687 a lut. Nimina thawh tam zualte zingah PWD Rs. 21,65,650, Commerce & Industries (ZIDCO, BDA, MKVIB, MIFCO) Rs. 10,71,657, SIPMIU & consultants Rs. 1,46,980, Planning & Programme Implementation Rs. 1,20,000 leh Aizawl West College Rs. 1,09,800 an tel a ni.

Vaimim ei chetu pangang - Fall Armyworm chu Lengpui rama Dialdâwk kam velah a awm leh ṭana hriat a nih avangin Mamit district-a Agricultural Technology Management Agency (ATMA) hotute chuan nimin khan an enfiah. Vaimim chingtute 

hnenah hian fall armyworm darh zel tur ven nan pangang thahna damdawi leh pangang manna hmanrua pheromone trap-te an pe a ni.