NEDP-ah MLA-te'n bial chei nan Cheng nuai 100 zel an nei dawn

Agriculture minister R Lalzirliana chuan, New Economic Develoment Policy (NEDP) chu NLUP thlakna a ni lo tih sawiin, NEDP hnuaiah MLA-te'n cheng nuai 100 zel bial chei nan an neih dawn thu a sawi.

Nimina Congress Bhavan-a inkhawmah thu sawiin, R Lalzirliana chuan, "NEDP hi NLUP thlakna a ni lo a, NEDP kalpui chungin NLUP kan kalpui zel dawn. State sum aṭangin NLUP atan sum eng emaw zat kan dah dawn," a ti.

Agriculture Minister chuan, NEDP hnuaiah MLA-te'n cheng nuai 70 zel khaw cheina turin sum an neih dawn bakah cheng nuai 100 zel bial cheina turin an nei dawn a ni.

Home minister R Lalzirliana chuan, Krismas leh kum thar vuakvêtah hâlpuah leh a kaihhnawih thilte khap a ni leh dawn tih sawiin, "Hâlpuah tel loa Krismas leh kum thar lawm hi kan culture ni thei se kan duh. Hâlpuah hi ṭhatna awm lo, ṭul loa sum sèn ralna, mihring leh rante hriselna tichhetu, damlote harsatna siamtu a ni," a ti.

R Lalzirliana chuan, hâlpuah leh a kaihhnawih thilte khap leh khapna kenkawh dan tur chu Central YMA-te nen kan la sawiho leh dawn tih a sawi a; sumdawngte chu hâlpuah leh a kaihhnawih thilte la lut lo turin a chah.

Bru lâk let tum mek sawiin Lalzirliana chuan, "Bru-te hian min chona vanga buai kan ni a, anmahni duh thu ngeia tlanchhia an ni a, sorkar leh NGO-te ngilneihna avangin welcome banner nen kan lo làwm ṭhin," a ti a; tuna an thil phût erawh chu an tihlawhtling thei lo tih a sawi.

Home Minister chuan, Lunglei Police Station mawi hnái tak sak an tum a, mahse, sak an tumnaah khawtlangin sak an duh lo a nih chuan sak loh mai ṭha an tih thu a sawi.

Aizawl khawpuiah traffic jam a ziaawm theih nan taxi intlân chhâwktir a nih thu sawiin HM Zira chuan, "A ṭul a nih chuan motor zawng zawng hi motor number tàwpa number mila intlân chhâwk tura rawtna awm hi a ṭha kan ti a ni," a ti.

MPCC Vice President ni bawk chuan, PRISM-in Mizoram Watch an buatsaih
ṭhinah an party chu an kal tawh dawn lo tih a sawi a, "PRISM-te hi a tìra an kal dan leh tuna an kal dan inang ta lo lutuk a, a tirah chuan sorkar khalh ngila ṭawiawm turin kan ngai a, Mizoram Watch-ah pawh kan kal ve ṭhin," a ti a; tunah chuan an kal dan a dik loa an hriat tâk avangin telna tlaka an ngaih tawh loh thu a sawi.

R Lalzirliana chuan, PRISM-te chuan inthlan lehah an chuh ve lo ang tih an sawi theih loh thu an sawi tawh nia sawiin, "Hetiang kawng an zawh takah chuan, keinina an programme tihhlut a, political platform siamsak kan duh lo. Chuvang chuan, an mi sawmna hi chhàn tlâkah kan ngai lo a, kal kan tum tawh lo. Political party ang chiahin tunah hian an awm tawhin kan hria," a ti.