MNF President-in Bangladesh puih a inhuam

MNF president Zoramthanga chuan nimin khan Mizo Hnam Runah thuthar thehdarhtute kâwmin, tun hnaia Bangladesh khawpuia an zin chanchin a sawi a; Chittagong Hill Tracts-a ram chhengchhia âwl zau tak chu sum lak luhna ṭha taka siam turin Bamboo Project atan puih an inhuam thu Bangladesh prime minister Sheikh Hasina a hrilh tih a sawi.

Zoramthanga sawi danin, amah bakah, MNF vice president Dr R Lalthangliana leh adviser Rosangzuala te chu October 22, 2016-a Bangladesh khawpui Dhaka-a Bangladesh-a rorel lai Awami League-in National Conference vawi 20-na an hmanpui a; conference-ah chuan MNF President hian thu a sawi bakah, Prime Minister nen an inkâwm.

MNF President chuan, Bangladesh PM Sheikh Hasina leh an sorkar hotute chu Chittagong Hill Tracts-a ram âwl, chhengchhia zau tak chu Bamboo Project din nan hman theih a nih thu leh chumi atan chuan an puih theih thu a hrilh tih a sawi a ni.

Zoramthanga chuan, Bangladesh sorkar hotute chu Myanmar ram leh India hmarchhak biala hel pawlte leh sorkar inkara remna palai hna a thawh dante a hrilh a, "Bangladesh ram pawh hmarchhak state-te nena inngheng reng a nih avangin, buaina chin a neih vete chinfel kawngah Bangladesh-in min mamawh a nih chuan kan inhawng reng tih ka hrilh," a ti.

Zoramthanga chuan, Dhaka-a a chàm chhungin Zo hnahthlak hrang hrang - Bâwm, Páng leh Chittagong Hill Tract-a hotu dangte’n an lo hmuah thu leh an harsatnate an sawiho thu a sawi bawk.

Hetih lai hian, nimina MNF party thuchhuah chuan, nimina Mizo Hnam Rûna inkhawmah MNF president Zoramthanga'n mi pariat a lawm lut niin a tarlang.