NLUP-ah state páwna Vawk lalut dawn lo

AH&Vety minister C Ngunlianchunga hoin nimin khan a pisaah AH&Vety department hotute an ṭhukhawm a; NLUP hnuaia vawk notê sem turah state páwna mi lak loh ni se, tiin an rel.

C Ngunlianchunga chuan, NLUP hnuaia sem tur vawk note leina atan Rs. 5,000 ruahman a nih thu sawiin, "A phurh kualna tur chu NLUP Implementing Board lamin ruahmanna an siam. Senso a tlem theih nan vawk note dawngtu turte khuaah vawk note lei tur a awm chuan leisak nghal mai tur a ni a, a phurh kual man kan hum thei dawn a ni," a ti.

NLUP hnuaia hma-laknaah neitu tak tak thinlung put a ṭul tih sawiin AH&Vety Minister chuan, "Kan department-ah hian sorkar pawhin rinna a nghat a, thawktute thawhrah kan seng mek a ni," a ti a; thawk ṭha duh lote vangin department a hmingchhiat palh a hlauhawm thu a sawi.

Meeting-a an rêl dan chuan, NLUP hnuaiah hian mi pakhat hnenah vawk notê paruk zel pek tur a ni a; pahnih chu a pui tur niin, pali chu talh tur a ni.

Vawk note sem tur chuan tualchhung aṭang te, NLUP hnuaia vawk dawng tawhte aṭangte leh Piglet Multiplication Centre (PMC) hrang hrang aṭanga lei khawm tum a ni.