State páwna zirlai tangkhangte'n Scholarship sem turin CM an ngen
Mizoram páwn khawpui hrang hranga zirlai pawl 12-te chuan, nimin khan chief minister Zoramthanga hnenah lehkha an thawn a; Covid-19 vanga Mizoram páwna zirlai tangkhang mekte'n harsatna an neih avangin a rang lama scholarship sem chhuak turin an ngen.
Zirlai pawlte hian Chief Minister hnena lehkha an thawnah hian, Covid-19 vanga state páwna zirlai tangkhangte tan Mizorama haw theih a la nih loh avangin harsatna hrang hrang an tawh thu an tarlang a, "Min châwmtu kan chhúngte lah eizawnna lama harsatna tâwk deuh vek an ni si a, kan chanpual neih chhun scholarship lam hi kan rawn hawi lo thei ta lo a ni," an ti.
Nikum lama scholarship sum sanction tawh anga an hriat first instalment pawh an la dawn loh thu tarlangin zirlai pawlte chuan, "Hemi chungchangah hian kan sorkar hian mamawhna a sàn êm avangin central aṭanga la sanction loh zawng min dil chhuahsak a, a rang lama zirlaite hnena sem turin kan rawn ngen a ni," an ti a, kawng dang a awm chuan a rang lama hriattir turin an ngen nghal.
Chief Minister hnena lehkha thawntute chu - Ahmednagar MSU, Bangalore MSU, Delhi MZP, Gujarat MZP, Guwahati MSU, Jalandahar MZP, Kolkata Mizo Students', Manipur MZP, Meerut MZP, Shillong MSU, Silchar MSU leh Pune MSU-te an ni.