Dan zâwm loa in sakte enfiah

Aizawl Municipal Corporation (AMC)-a technical team-te chuan, nimin khan danin a phal baka sánga sak in pathum an endik a; an report
aṭangin a ṭul angin hmalak a ni dawn.

AMC technical team-te hian Khatla-a R Lal-awia in, Bungkawna Lai House leh Melthum dai, Zampuimanga lungphun bula Jeffrey Zampuimanga Building sak mekte an enfiah.

Endiknaah hian AMC technical team-te hi local council-te'n an ṭawiawm a, awm tura tih an nih angin in neitute pawh an awm a ni.

AMC tarlan danin, Khatlaa R Lalawia in chu chhawng ruk thleng sak phal a nih laiin, chhawng kua thleng sak a ni a; in neitute chu January 6, 2015-ah stay order pek a nih bakah, September 9, 2015-ah insawifiah tura hriattirna (show cause notice) pek leh a ni.

Jeffrey Zampuimanga Building sak mek chu ft. 72 thleng sak phal a nih laiin, ft. 79.3-a sangin sak a ni. In neitu hnenah hian October 6, 2016-ah stay order leh show cause notice pek a ni a; October 27, 2016-ah chhâwng hnuai lam pang chauh sak chhunzawm phalna pek a ni.

Bungkawna Lai House chu chhâwng nga sak phal a nih laiin, chhawng riat tura sak mek a ni. Building enkawltute hnenah September 23, 2016-ah stay order pek a ni a, October 6, 2016-ah show cause notice pek a ni bawk.