KHAWTHLIR

LC-te hrilhfiah

SIPMIU chuan Aizawl khawpuia solid waste management an kalpui mek chungchangah nimin khan Aizawla local council-te tan Tourist Lodge, Chaltlangah bawlhhlawh senghawi dan tur leh sâwngbawl dan tur sawihona an buatsaih. He hunah hian thil pawimawh hrang hrang an inhrilhfiah a ni.

MZU-ah seminar

Mizoram University-a National Service Scheme (NSS) leh National Council of Rural Institute, Hyderabad-te chuan nimin khan MZU-ah 'Motivation of Youth for Inspiring Rural Reconstruction' tih hun an buatsaih a, MZU vice chancellor Prof. R Lal­thantluanga'n a hmanpui.

CADC bànsan

Chakma Autonomous District Council (CADC)-a Chief Executive Member adviser Tarani Chakma, Chakma District Congress Committee-a vice president ni bawk chuan tun hnai khan a nihna a bànsan. Thu dawn danin, Tarani Chakma hian October 24, 2016 khan bànna a thehlut a, October 26-ah pawmsak a ni.

Pump hawng

Chief minister Lal Thanhawla chuan Ningani tlai khan Aizawl-Lunglei World Bank kawng kam, Sailam bazar-ah petrol pump thar Zozo Filling Station a hawng. CM chuan, kawngkam leh dawra petrol zawrh chu sorkar dan bawhchhiatna a nih thu sawiin, "DC leh SP-te'n he dan leh hemi chungchanga thupek awm sa chu khauh zawka an kenkawh a ṭul," a ti.

Kawng zawh

Lungleia smoke free school-a puan, Southern Flower School zirlaite chuan Lunglei khawpuiah Temperance Free Rally an nei a, Lunglei Higher Secondary School aṭanga Saikuti Hall kawt thlen kawng an zawh.