MNF ṭhalaite vangin stamp duty lakna Dan hi suspend a ni lo - R Romawia

Land Revenue & Settlement (LRS) department R Romawia chuan, stamp duty rate tihsanna tura dan siam, The India Stamp (Mizoram Amendment) Act, 2016 hman chhunzawm rih loh tura an tih chu MNF ṭhalaite'n LRS Directorate-a pisa kai turte an dan vanga tih a ni lo tih a sawi a, "House-ah sawi nawn leh mah ila, 2% hi kei chuan a rate tihniam tur chuan ka pu lût lo ang," a ti.

Nimina Congress Bhavan-a inkhawmah thu sawiin, R Romawia chuan, "MNF ṭhalai punkhawm vanga The Indian Stamp (Mizoram Amendment) Act 2016 hi suspend a ni lo," a ti a; ngaihtuah nawn an tum sa hrim hrim nia sawiin, an party mite chu tláwm ta viaua inngai lo turin a chah.

R Romawia chuan, stamp duty chu MNF sorkar laia an tihdanglamah, rate mumal a awm loh avangin, fixed rate-a siam a, 2%-a hrût rual ṭha an tih avangin ram hlutna aṭanga 2%-in an hrût rual ta niin a sawi.

Dan pass a nih aṭanga thla ruk chhunga Evaluation Committee siam turin hma la char char mah se, an la ti thei lo tih sawiin, Romawia chuan, "Thla ruk chhunga tih inbeisei kan ni a. Inpector General of Collector siam turin kan la táng a, staff 30 vel a ngai dawn a, hei hi kan la din theih si loh avang leh, Chief Minister pawhin a ngaimawh avangin ngaihtuah kan tum sa hrim hrim a. Kan ngaihtuah hmain MNF ṭhalaite an rawn che ta vak a ni," a ti.

LRS Minister chuan, Sep-tember 1, 2016 aṭanga stamp duty rate thara an lak aṭanga dan an tihtawp lailâwk thlengin Rs. 5,00,000 vel lak hman a nih thu sawiin, "Kan lak tawh erawh hi chu ngaihtuah ngun a ngai. Pawisa in refund mai mai a harsa a, dâwra thil inleisak mai mai ang a ni lo," a ti a; dan khawih thil a nih avangin LRS, Law & Judicial leh Finance department-te nen ngun taka ngaihtuah phawt tur a ni tih a sawi.

Minister chuan, The India Stamp (Mizoram Amendment) Act, 2016 suspend lailawk chu Assembly House-ah sawi nawn leh a nih pawhin, ani chuan a rate (2%) tihniam tur zawng chuan a put luh loh tur thu a sawi a, "Dan kan suspend hi a rate tihhniam lam vang a ni lo. He dan hi kan withdraw lo a, kan suspend rih mai chauh a ni," a ti.

Sorkarin sum tlem tlema hmuh dan tur a zawn reng a ngai a, chu chu sorkar sum hmuhna pawimawh a ni tih sawiin, R Romawia chuan, "Mirethei lam hawi zel hi kan kal dan a ni a, mipui tawrhna sorkar kan ni ang tih kan hlau em em a ni," a ti a; miretheite'n an tawrh lutuk lohna turin hma an la ṭhin niin a sawi.