Larsap leh CYMA hruaitute an inkâwm

Central YMA hruaitute chuan nimin khan Raj Bhavan-ah Governor Lt.Gen. Nirbhay Sharma an kâwm a; eirawngbawlna gas tihchingpen chungchanga an hmalakna leh ruihhlo an do dante an hrilh.

Larsap chuan, CYMA an hmalakna hrang hrang chu fakin, ram leh hnam tana an thawh zelna tura duhsakna a hlan a, "Mizo ṭhalai tam zawkin sipai an zawm theih nan training mumal taka pek a nih theih nan YMA-in hma la se a duhawm. Mizorama Sainik School din turah zirlai mipa leh hmeichhia lak ve ve tum a ni a, hei hi ram pumah a hmasa ber a ni dawn," a ti.

Mizo zirlai leh ṭhalaite'n ram chhung state dangte tlawh a, hnam hrang hrang ziarângte an hriat theih nan Bharat Darshan neih ṭha a tih thu sawiin Gover-nor chuan, "Mizoramah remna leh muanna a awm a, Mizote chu hnam leh khawtlang ṭangrual tak, ziak leh chhiar tamna state a ni. Duhthusama sik leh sa nuam, thlai eng pawh ṭhat duhna hmun a ni bakah, a chhunga cheng an tam lo bawk nen, khawvel hriat phaka thleng sang thei hnam a ni," a ti a; ṭawng dang thiam belh kawngah Mizote'n ṭan an lak a ṭul thu a sawi.

CYMA hruaitute chuan, an hmalakna zarah Mizorama gas harsatna sutkian mek a nih thu te, ruihhlo tawlhru ṭhin zawn chhuah an nih thute leh, Mizoram leh Bangladesh leh Myanmar ramri venna hna leh checkgate-te pawh khauh zawka kalpui ni thei se an duh thu Larsap an hrilh a ni.