RIPANS Graduation & Lamp Lighting

Regional Institute of Paramedical and Nursing Sciences (RIPANS) chuan nimin khan Graduation and Lamp Lighting Ceremony an hmang a, Health minister Lal Thanzara'n a hmanpui. He hunah hian department paruka zirlai zo mi 157-te thlah an an ni.

Health Minister chuan, graduate tharte chu an hlawhtlinna a lawmpui thu sawiin, "Mi dang puih hna thawk tura ṭhalai heti zat inpe an awm hi a thlamuanthlak a, discipline hrang hranga graduate tharte zingah hna hmua thawk mek an awm chu RIPANS zirtirtute thawhrimna leh inkaihhruaina ṭhatzia tilangtu a ni," a ti a; graduate tharte chu hna an thawhna hmun apiangah taima taka thawk turin a fuih.

Nursing hna chu hna dang tam tak nena khaikhin theih loh, inpekna thûk tak nena thawh chi, hna zahawm leh chhuanawm a ni tih sawiin, Lal Thanzara chuan, "An hna ang hi mi tam takin an tlin loh tur a ni a, nurse
ṭang lai mekte leh zirlaite inpekna hi a fakawm hle a ni," a ti. Nurse-te chu an mawhphurhna a san avangin engtik lai pawha fimkhur taka thawk reng tur te, mi dang pui tura an intiamna theihnghilh loa chhel leh rinawm taka thawk turin a chah.

Health Minister hian course hrang hranga zirlai ti ṭha zualte hnenah lawmpuina thuchei leh chawimawina a hlan a; B.Sc (Nursing) zir thar turte pualin senior lecturer Kapzawni kaihhruaiin Lamp Lighting Ceremony neih a ni.

Kuminah hian RIPANS aṭangin Bachelor of Nursing, Bachelor of Pharmacy, Bachelor of Science in Medical Laboratory Technology, Bachelor in Optometry, Bachelor of Science in Radio Imaging Technology leh Master of Pharmacy-ahte zirlai 157 an graduate thar a; distinction-ah mi 17, first division-ah mi 135 leh second division-ah mi panga an pass.

RIPANS hi kum 1996-ah North Eastern Council-in India hmarchhak mite tana a din a ni a, April 2007-ah sorkar laipuia Ministry of Health & Family Welfare hnuaiah an awm. Tun dinhmunah zirlai 690 an awm mek a, master of pharmacy zirna pawh a awm tawh a ni.