PRISM-in mak an ti

PRISM chuan thu-chhuah siamin, Kau-Tla-bung Mini Hydel Project leh Tuipanglui Mini Hydel Project (MHP) thubuai tâwp dan chu mak an tih thu leh nuihzatthlak an tih thu an tarlang.

Kau-Tlabung MHP leh Tuipanglui MHP siam danah eirûkna a awm nia hriat vanga FIR leh PIL thehluttu PRISM chuan, "Nasa taka eirukna awm leh dan bawhchhiatna awmte hi chiang takin chhuichhuah a ni a, tu tute emaw hnena pawisa pekte pawh chiang taka hâi lan niin, an inpekna cheque-te pawh man chhuah a ni," an ti.

Sorkarin Supreme Court-a thubuai a khin letna Supreme Court-in a hnâwl avangin beiseina thar an neih tawh chu a chhuitute'n an chhui zawha officer lian rual an ziah fihlîm avangin beidawnga rûmnaah chantir a nia sawiin, PRISM chuan, "A hnukhawia mi paliin case an la neih ve ṭêk ṭêk pawh, evidence awm ṭhat loh vanga witness pawh exam loha a zuihral leh ta hi mak kan ti a. He case chhuina kal tawha evidence ṭha tak tak awmte pawh mi tam takin a document kan neih laia sorkarin evidence a nei lo hi nuihzatthlak kan ti hle a ni," an ti.