Hmarchhak state-in an state pawna an mi leh sate an Ṭanpui dan

Covid-19 hripui avangin India hmar chhak mite an state pawnah mi tam tham tak an tang­khang mek a, heng mite ṭanpuina tur hian hmar chhak state sorkar hrang hrangte'n ruahmanna an siam. 

Nimin khan Mizoram sorkar chuan state pawna Mizo tangkhangte tan mipui sum thawhkhawm sa Chief Minister's Relief Fund aṭangin pawisa pek dan tur a ruahman.

Assam sorkar chuan ram puma lockdown puan a nih avanga an state mi, hmun danga tangkhang mi 86,000-te chu Rs 2,000 ṭheuh a sem tawh. 

Health minister Himanta Biswa Sarma chuan 'Assam Cares' hnuaiah a thawh khatna atan cheng vaibelchhe 17.20 pek chhuah a ni tawh tih a sawi, lockdown kalpui chhungin a thawh hnihna pawh pek tum leh a nih thu a sawi. 

Sarma chuan sorkar chuan an state mi, state danga damlo in enkawl mekte pawh ṭanpuina, Rs 25,000 ṭheuh pek an ni bawk tih sawiin, damlo 647 hnenah he ṭanpuina hi pek a ni tawh a ni, a ti. Heng bakah hian India ram pawna tangkhang mek mi 32 te chu US dollar 1,000 ṭheuh pek an ni tawh bawk a ni. 

State pawna tangkhangte ṭanpuina tur scheme hmang hian ramchhung hmun danga an state mi awm zat leh, an awmna hmun thlengin an hriat theih phah tih minister chuan a sawi. Lockdown hlih a nih hunah an state-a an haw theihna tura  hmalaknaah pawh hei hian a pui dawn  hle tih minister chuan a sawi. 

Assam sorkar chuan coronavirus do letna kawnga sorkar hmalaknaa puihna turin kum  khat chhung atan chief minister, minister leh MLA-te hlawh chu 30% in a tihniam bawk. MLA-te hlawh aṭanga 30% hi sorkarin Covid-19 damlo te enkawlna senso leh hri leng dona atana a hmalakna  hrang hrangah a duh angin a hmang thei dawn a ni. 

Meghalaya sorkar chuan state pawn lama an state mi tangkhang, zirlai leh inhlawhfaa awm mi 3,000 chuangte chu chhawmdawlna, Rs 3,000 ṭheuh a pe. 

Deputy chief minister Prestone Tynsong chuan state pawn lama tangkhang tam zawk hi zirlai an nih thu sawiin, heng zirlai leh inhlawhfaa awmte ṭanpuina pek an ni tih sawiin, sorkar office-a thawkte erawh chu a huam tel lo tih a sawi. Deputy CM chuan an state mite tangkhangna state hrang hrang sorkar pawh bepawpin, harsatna leh buaina an neihte chinfel sak turin sorkar chu a inpeih reng tih a sawi bawk. 

Meghalaya sorkar hian lockdown puan vanga hnathawk thei lo, unorganised sector hnuaia inhlawhfa, sorkar-a in register-te chu March 23 aṭang khan kar tin Rs 7,00 zel a pe a, Central Act  hnuaia sorkar-a in register, construction worker-te chu Rs 1,000 a pe bawk a ni. Inhlawhfa, chhawmdawlna a pekte hi mi nuai 1.20 vel an tling a a ni. 

Manipur chief minister N Biren Singh chuan lockdown avanga hmun danga tangkhang, an state mi 3,771-te chu chhawmdawlna Rs 2,000 ṭheuh state sorkarin a pe tawh tih a sawi. 

Chhawmdawlna hi an bank account-ah ṭheuh thunsak an ni tih CM chuan a sawi a, hmun hrang hranga tangkang dang 10,000-11,000 vel an la awm tih sawiin, heng mite pawh hi zawng chhuakin ṭanpuina sum hi pek vek an ni dawn bawk tih a sawi a ni. 

Manipur sorkar hian lockdown puan a nih hnuah  hmun danga an mi leh sa tangkhangte puih an nih theihna turin Tengbang.in website a siam nghal a, website-ah hian state danga zirlai leh hnathawka awm mi 17,000 chuang an in register tawh a ni. 

Nagaland chief minister Neiphiu Rio chuan Nagaland mi, state pawn lama tangkhang mekte chu chhawmdawlna pek an ni dawn tih a sawi. 

Lockdown avanga state danga tangkhang mek zinga damlo inenkawl tura kalte chu Rs 20,000 ṭheuh pek an ni dawn a, hnathawka awmte chu Rs 4,000 leh zirlaite chu Rs 3,000 ṭheuh pek an ni dawn tih CM chuan a sawi. 

Hmun danga tangkhang mekte pual hian Nagaland sorkar chuan portal hran, iamstranded.nagaland.gov.in  a hawng nghal bawk. He portal kaltlang hian state pawna tangkhang mek, Naga mite chu biak pawh a, puih an ngaihna laite ngaihtuah a ni a, ei leh in lama harsatna an neih dan leh, awmna hmun tur chungchang thlengin sorkar chuan a ngaihven pui a ni. 

Nagaland sorkar chuan an state mi, hmun danga tangkhang mekte puihna tur category pali siamin - Health & Medicine, Food & Supplies, Accommodation and Financial Assistance. Heng category aṭang hian puih an ngaihna laiah an hming, awmna hmun leh an contact number-te an dah tir a ni. 

Sikkim sorkar chuan state danga an state zirlai tangkhang mekte chu Rs 5,000 ṭheuh a pe. 

Chief secretary SC Gupta chuan  lockdown avanga Sikkim-a haw thei lo, zirlai tangkhang mekte hi an bank account-ah Rs 5,000 ṭheuh thunsak an ni tih sawiin, hei hi chief minister office leh education department-in an buaipui a ni, a ti. 

Arunachal Pradesh chief minister Pema Khandu chuan state danga Arunachal mi tang­khangte chu Rs 3,500 ṭheuh pek an  ni tih a sawi. 

Lockdown avanga Arunachal mi, hmun danga tangkhang hi mi 14,859 awmin, heng mite hi an awmna bialtu MLA te ṭheuh hnena finfiah an nih hnuah, ṭanpuina Rs 3,500 ṭheuh hi an bank account-ah thun sak an ni. 

Arunachal sorkar hian lockdown avanga hna thawk thei loa awm, state chhunga loneitute chhamdawlna turin cheng vaibelchhe 7.16 a pe bawk. He chhawmdawlna hi PM-Kishan scheme hnuaia inziak lut, loneitute hnenah Rs 1000 ṭheuh sem a ni. 

Tripura sorkar chuan ram chhung hmun hrang hranga an state mi tangkang mekte ngaihvena buaipui turin working group a din a, he group  hi principal secretary for transport LH Darlong chuan a ho a, Apurba Roy, secretary P&C leh R Gopal Rao, DIGP (crime) police headquarter-te chu member an ni. 

Working group hian state danga Tripura mi tangkhang mekte chu be pawpin, an harsatna neih hrang hrangte zawtin, an pui a ni. 

Tripura sorkar chuan coronavirus leng mek dona kawnga sorkar hmalakna puihna turin, kum khat chhung atan MLA-te hlawh chu 30% a tih hniam a nih thu a puang tawh bawk. MLA-te hlawh tihhniamna aṭang hian sorkar chuan kum khat chhungin cheng vaibelchhe 1.6 a hum thei dawn a ni.