P&E dept. leh S. Chawngtui inkarah buaina

Hnahthial district chhunga S. Chawngtui Branch YMA chuan thuchhuah siamin, kum 10 chuang an humhalh tawh Tuiphai lui chu North Vanlaiphaia Power & Electricity department executive engineer leh a driver-te'n bomb hmangin an khawih a, chumi avanga buaina kal zelah P&E EE thupek angin S. Chawngtui chu power supply an pe duh lo niin an tarlang.

Hetih lai hian, P&E hotute chuan, S. Chawngtui YMA puhna chu a dik tawk loa a lan thu leh Branch YMA chêt dan avanga P&E duty-te awm ngam loa an chhuahsan avangin kawlphetha pek theih an nih loh thu an sawi.

Thil thleng leh buaina chungchang hi vawiinah Hnahthial DC leh YMA Sub-Headquarters, Lunglei hruaitute hoin P&E department aiawhte leh S. Chawngtui YMA aiawhte'n an sawiho dawn nia thu dawn a ni.

S. Chawngtui YMA thuchhuah tarlan danin, April 10, 2020 (Zirtawpni) khan N. Vanlaiphaia P&E EE leh a driver-te'n bomb hmangin Tuiphai lui an khawih avangin S. Chawngtui YMA chuan dan an neih lai angin Rs. 5,000 chawi tura tih an ni.

Chutiang a nih lai chuan, April 19, Pathian­ni zan khan P&E department duty pakhat Nanu-a (vai) chuan Tuiphai luiah lènkhang a zár a, man a nih hnuah P&E department quarters ṭhenkhat chu YMA-in an endik a, lènkhang tam tak leh zu an man zui a ni.

YMA duty-te'n P&E quarters an endik chu P&E hotute lamah quarters kawngkhar leh bungrua tichhia anga report a ni a, chu vang chuan April 20 chhûn leh zanah S. Chawngtui chu N. Vanlaiphaia P&E EE thupek angin electric current pek an ni lo niin YMA thuchhuah chuan a tarlang.

S. Chawngtui YMA chuan, dan bawhchhiate'n an chunga action lâk a nih avanga an thuneihna dik lo taka an hmang chu an rilru a nat thu sawiin, "Engtiang pawhin kan chungah thil ti pawh ni se, dan phal loh thil titute hi an chungah action lâk kan tum zel dawn a ni," an ti. An thuchhuah hi YMA president Lalngurliana Sailo leh secretary MC Lalpianpuia te hminga tih­chhuah a ni.

S. Chawngtui YMA thuchhuah chung­changa zawhna chhangin P&E hotute chuan, P&E EE chuan lui chu bomb hmanga a bomb tir loh thu te, sangha an manna hmun pawh tuikhuah tui lâkna kawnga mi a nih thu te, S. Chawngtui YMA-te chuan an puh ve mai mai a nih hmel thu an sawi.

P&E hotute sawi danin, EE chu April 4-ah P&E site-a awmte hnathawk enin a kal a, chumi ní chuan tute'n emaw sangha an man a, EE leh a naute chu mawhphurtuah puhin, Rs. 5,000 cháwi turin an ti a, lehkha pek an ni. Mahse, sangha an man loh avangin Rs. 5,000 a chawi loh tur thu a hriattir a ni.

April 19 zan zanlai velah Chawngtui YMA-in P&E hnuaia duty vai ho an rîkrâp a, P&E quarters ṭhenkhat kawngkhar leh bungruate an tichhia a ni. P&E SDO-te an lungawi loh avangin site-a duty an naute'n Chawngtui mite kut an tawrh an hlauhthawn avangin an chah haw vek a, chuvang chuan power supply an pe thei ta rih lo a ni. Quarters khawih avang hian P&E hotute chuan police-ah FIR an thehlut.

Power supply cut sak anga sawi chung­changah P&E hotute chuan, "Khu laia thawktute ber an rawn chhuah vek chuan power an nei lo chu a ni mai a, thawktute an awm zui ngam lo. Maicham Power House-a thawk vai ho pawh an awm ngam lo a, anni pawh inlâk chhuah an tum tih an rawn sawi," an ti. Vanlaiphaia EE chu kohhran upa, pa fel tak a nih avangin S. Chawngtui YMA-in an puhna chu rin harsa an tih thu an sawi bawk.

P&E hotu pakhat chuan, tun hma aṭang tawhin P&E leh S. Chawngtui khuain buaina neuh neuh an nei tawh ṭhin a, tuna EE awm hmaa EE hmasa zawk hun lai pawhin power supply pe loin hun eng emaw chen an lo hrem tawh tih a sawi a, "Kan staff-te hi project hmuna awmchilh reng an nih avangin sangha man leh lui kalah ringhlelin an puh ṭhin a, pawisa chawi turin an ti fo. Kan naute zingah sangha man an awm chuan chiang taka in man a, an lo ti ngei a nih chuan keini pawhin action kan la ang kan lo ti ṭhin," a ti.