Tangkhangte ṭanpui vat turin sorkar phût

ZPM party chuan thuchhuah siamin, Mizoram sorkar chu state páwna Mizoram mi leh sa tangkhangte ṭanpuina pe vat turin an phût.

Nimina ZPM thu­chhuah chuan, "Kan ṭhenawm state-te'n ṭanpuina an pek zat ang Mizoram sorkar hian ṭanpuina a pe ve thei lo a nih pawhin, hrehawm taka hnam dang kara tangkhang mek Mizoram mi leh sate hi ngaihsakin ṭanpuina eng emaw zat tal pe ve ngei turin Mizoram sorkar kan phût a ni," an ti.

ZPM tarlan danin, hmarchhak state dangin an mi leh sa state páwna tangkhangte an ṭanpui dan chu, mi pakhat tan zel - Arunachal Pradesh-in Rs. 3,500 zel, Manipur-in Rs. 2,000, Meghalaya-in Rs. 3,000, Sikkim-in Rs. 5,000, Assam-in Rs. 2,000 (mi 8,600 an ṭanpui tawh), Nagaland-in zirlai tan Rs. 3,000, hnathawk Rs. 4,000 leh damlo Rs. 20,000 ṭheuh a ni.

State páwnah mi eng emaw zat an tangkhang tih sawiin ZPM chuan, "Zirlai, hnathawk, damlohna vang leh chhan dang vanga tangkhang an ni ber. Mizorama an rawn haw theih loh avang­in an awmna hmun ṭheuha an tawm char char a ngai a, ei leh bara harsatna tâwk eng emaw zat awm tawha hriat a ni," an ti.

ZPM chuan, sorkar hotute'n sumah tàwp chin (limit) awm loa hman tur a tam an ti chungin state sum tun thlengin Mizoram sorkarin a la pe chhuak lo tih sawiin, "State dangte'n an mi leh sate tan special scheme an puan ul ul lai hian Mizoram sorkar sum báwm hi che ve rawh se, mi thil phalte leh tlawm­ngaite thilpeka innghat ringawt lo hian," an ti.