Thisen pek zat unit 30,499 SBTC-in lawmthu an sawi

Mizoram State Blood Transfusion Council (SBTC) chuan thuchhuah siam­in, sorkar kum liam ta 2019-20 chhunga Mizoram puma thisen pek zat chu unit 30,499 a ni tih an tarlang a, thisen petute zawng zawng chungah lawmthu an sawi.

SBTC chuan, thisen pek zawng zawng zinga unit 27,727 chu voluntary donation a ni tih sawiin, "Hei hi thisen pek zawng zawng aṭangin 90.91% a ni. Blood donation camp vawi 494 lai neih a ni a, camp-a thisen lâk zat chu unit 20,497 a ni," an ti.

Mizoram SBTC chuan, "Damlo mamawhtute tana tlawmngai taka thisen petu pawl hrang hrang leh mimala blood bank-a pe ṭhinte hnenah te, district tina theihtawp chhuahtu AVBD-te leh rim taka thawktu blood bank staff-te hnenah lawm­thu kan sawi a ni," an ti a; kum 2020-21 ah pawh theih­tawp chhuaha pe zel tur­in mipui an sáwm a ni.