Mizoramah dengue vei mi 58 hmu tawh Enkawl that chuan a hlauhawm lo - IDSP
Mizoramah kumin chhungin nimin thleng khan thosi seh aṭanga natna kai theih chi khat, dengue vei mi 58 hmuh chhuah a ni tawh. Integrated Diseases Surveillance Programme (IDSP) nodal officer Dr Pachuau Lalmalsawma chuan, Mizorama dengue léng chu enkawl ṭhat chuan a hlauhawm loh thu a sawi.
Vanglaini palai zawhna chhangin Dr Pachuau Lalmalsawma chuan, Mizorama dengue léng mek chu a hlauhawm ber chi a ni lo tih a sawi a, "Dengue hi chi hrang panga a awm a, Mizorama léng mek hi a hlauhawm zinga mi a ni lo. A veite enkawl vat an nih chuan a hlauhawm loh a, a vei nia inrinhlelhna neih chuan inenkawl vat tur a ni," a ti.
Dr Pachuau Lalmalsawma chuan, dengue vei nia inringhlelte chuan sub-centre, urban health centre leh damdawi-in an pan thei tih sawiin, "A hma thei ang bera inentir vat a ṭha ber," a ti a; dengue vei hmuh chhuahte chu damdawi-ina admit kher ngai loin, in lama inenkawltira dam lehte an awm thu a sawi.
Dengue vei an awm chuan sub centre-ah report vat tur a ni tih sawiin IDSP Nodal Officer chuan, "Dengue vei enkawl dam ringawt a tawk lo. Dengue hrik pâi thosi tihhlum a nih loh chuan mi dang a seh leh zel thei. Sub-centre-a report a nih chuan anni'n thosi tihlum turin hma an la dawn a, chumi atan chuan thil pawimawh hrilh vek an ni tawh," a ti.
Dengue vei an finfiah tawh chu mi 58 an ni tawh tih sawiin Dr Lalmalsawma chuan, "Tunah hian rinhlelh vanga endik, a result nghah mek kan la nei. Dengue vei hmuh chhuahte hi Aizawl chhunga mi deuh vek an ni a, thingtlang tlem an awm a, anni pawh hi Aizawla an awm laia vei an nih leh nih loh zir chian tum a ni," a ti a; Aizawlah hian veng 16-ah dengue vei an hmuh chhuah tawh thu a sawi.
Kumin dengue vei hmuh chhuah mi 58 nen hian Mizoramah dengue vei mi 133 hmuh chhuah a ni tawh a, kumin hi dengue vei hmuh chhuah tam ber kum a ni.
Dr Pachuau Lalmalsawma chuan, dengue laka invenna atan thosi awmna tur tui tling tihfai leh thosi tihhlum a pawimawh tih sawiin, "Dengue hrik pai thosite hi a dum leh a vára ṭial an ni a, a tlangpuiin milimetre 2-a sei an ni. Aesdes hi tui fím tlingah an inthlah pung vak ṭhin a, chuvangin, dengue natna hi fûr ruahtui tlak lai leh tlak zawh hnuah a hluar ṭhin," a ti.
IDSP Nodal Officer sawi danin, dengue hi a hrik pai thosi seh aṭang bakah, dengue hrik pâi telna thisen dawn emaw, taksa inpek aṭanga kai chhawn theih a ni.
Dengue lan chhuah dan
¬ Khawsik sang tak
¬ Lu leh ṭhal báwr ná
¬ Mitmu ná, khaw ênga mit men harsa
¬ Ruh leh tihrâwl ná
¬ Chaw ei tui lo
¬ Awm, kut leh ke báwr vela bawl sen awm
¬ Luak chhuak leh luak