Vanglaini zirchianna Raj Bhavan tura sak ṭhiah leh tâkah Sorkarin nuai 701 a sêng thlawn

MNF sorkar lai, kum 2002-a New Secretariat Complex-a Raj Bhavan tura sak chu kum 2008-a Congress party kaihhruai sorkar a pian hnuah ṭhiah tura tih a ni. In sakna atana sum hman tawh zat chu Rs. 7,08,69,000 a ni a; a ṭhiahnaah sorkarin Rs. 7,32,840 a hmuh lêt leh avangin sorkarin sum a sên thlawn zat chu Rs. 7,01,36,160 tihna a ni.

New Secretariat Complex-a Raj Bhavan sa tur hian Mizoram PWD chuan September 26, 2002-ah work order a tichhuak a; hna chu chi li - residence building, secre-tariat building, ceremonial wing building leh external development-ahte ṭhen a ni. Kum li vel sak hna thawh a nih hnuah, hna chu October 20, 2006-ah chawlhsan a ni.

Raj Bhavan sawn tum chhan

Kum 2002-a chief minister Zoramthanga, MNF president chuan Vanglaini zawhna chhangin, New Secretariat Complex-a Raj Bhavan sak an tih chhan chu Aizawl khawpui laili tihthâwl tumna vang a nih thu a sawi a; tuna Raj Bhavan awmna lai chu vantlang tana zuah an tum thu sawiin, "Green place atan kan ti a, vantlang hmun atan hman kan tum a ni," a ti.

MNF vice president Dr R Lalthangliana pawhin, New Secretariat Complex lamah Raj Bhavan sawn a nih chuan, tuna Raj Bhavan hmun chu vantlang tan zuah a, mimal leh sorkar tan in sa loin, mipui lên khawthawnna hmun atan hman an tum thu a sawi a, "Assam Rifles-te pawh tuna an awmna aṭangin chhuahtir kan tum a, chu'ngte nen chuan vantlang hmun atan hman ṭha kan tih avangin khatih hun lai khan Raj Bhavan hi sawn kan tum a ni," a ti bawk.

Thiah leh a nih chhan

Mizoram PWD-in RTI Act hmanga zawhna an chhan danin, New Secretariat Complex-a Raj Bhavan tura sak chu hun eng emaw chen khawih loha a awm hnuah, December 2, 2015-a Law & Judicial minister Lalsawta hoa meeting chuan
ṭhiah a, a hmun chu High Court hmun atan hman turin thutlukna an siam. January 20, 2016-ah building sak tawhte chu ṭhiat turin Law & Judicial deputy secretary Vincent Lalrokima'n PWD secretary hnenah a hriattir a ni.

Raj Bhavan tur satute

Raj Bhavan tur sa tur hian Mizoram PWD chuan September 26, 2002-ah mi pathum hnenah work order a pe. H Sapthlengliana, Chaltlang chu Raj Bhavan residence building sa tura tih a ni a; Thanzauva, Chawnpui chu ceremonial wing building sa tura tih niin, K Liankamlova, Chaltlang chu office & secretariat building sa tura tih a ni. Building pathumte chu thla 18 chhunga sa zo tura tih an ni bawk.

PWD chuan, New Secretariat Complex-a Raj Bhavan thar sak nan hian Rs. 7,08,69,000 hman tawh a nih thu a tarlang. Raj Bhavan thar tura tih hi tihpuitlin a ni lo a, tunah
ṭhiah a nih leh tâk avangin sorkarin Rs. 7,08,69,000 a séng thlâwn tihna a ni.

Raj Bhavan tur thiah a ni

Law & Judicial department-in Raj Bhavan tura sak tawh chu ṭhiat tura a tih angin, PWD chuan a ṭhiattu tur thlan nan May 3, 2016-ah tender a chhuah a; building pathumte chu
ṭhiat turin mi pathum ṭheuhin an chháng a, ṭhiat turin North East Consultancy Services (NECS) thlan a ni.

NECS-in tender a chhanna zatte chu - residence building atan Rs. Rs. 3,09,770, ceremonial wing building atan Rs. 2,75,900 leh office & secretariat building atan Rs. 1,47,170-te a ni a; a ṭhiattu turin PWD-a sum a pek (deposit) ni aṭanga chhiara ni 45 chhunga ṭhiat zo tura tih a ni.

Buidling ṭhiattuin tender a chhanna zat belhkhawm hi 7,32,840 a ni a, hei hi sorkarah a lut leh a ni. PWD hotute chuan, Raj Bhavan tura sak tawh building hmaraw hluite chu a
ṭhiattuin an chang thung tih an sawi.