Mizoramah 0.68% HIV vei

Mizorama HIV/AIDS dona kawnga hmalak zui dan tur ngaihtuahin Aizawl District AIDS Prevention and Control Committee (DAPCC) chu nimin khan an chairman Kannan Gopinathan, Aizawl DC hoin a pisa-ah an ṭhukhawm a; Mizoramah mihring awm zat aṭanga 0.68%-in HIV hrik an pâi thu an tarlang.

Meeting chuan, Mizoramah HIV/AIDS a darh mek zel tih a lan chian avang leh a do kawngah nasa zawka ṭan lak thar a nih loh chuan harsatna lian zawk thleng thuai thei a nih avangin, high risk group zingah leh high risk place-ahte uar zawka fimkhur leh invenna lam kalpui chhunzawm an rél.

HIV/AIDS chung-changah, pawl hrang hrang leh mipuite'n rilru zau zawk an put theihna tura hmalak leh, AIDS natna dona kawngah pawl hrang hrangte nen thawhhote a pawimawh an ti a; hengte hi a hlawhtlin theih nan chak zawka hmalak an tum.

Meeting-a tarlan danin, India ram hi khaw-vela HIV hrik pai tamna ber pathumna a ni a, HIV hrik pai mi nuai 20 chuang awmin, chu chu India ram mihring zat
aṭanga chhûtin 0.30% a ni. India ramah Mizoram hi mihring awm zat
aṭanga chhutin HIV hrik pai tamna dawttu a ni a, HIV hrik pai 0.68% an awm.

Kum 1990 aṭanga 2016 thlenga Mizorama thisen endik mi 5,37,561 zingah HIV hrik pai mi 12,582 hmuh chhuah a ni a; HIV hrik pai zinga mi 9,184 chu Aizawl district-a mi an ni.

Kum 2012 aṭanga kumin September thla thleng khan Aizawl district-a thisen endik zawng zawng mi 1,39,751 zingah HIV hrik pai 4,286 hmuh chhuah a ni a; kum 2015-16 chhung bikah HIV hrik pai mi 1,025 hmuh chhuah a ni.