Science leh Maths-a tithate lawmman pe

SCERT chuan nimin khan Vanapa Hall-ah Cash Award for Proficiency in Science & Mathematics 2016 semna inkhawm an buatsaih a, School Education minister H Rohluna'n Science leh Mathematics-a tiṭha zirlaite hnenah lawmman a hlan.

H Rohluna chuan, a bulṭhut aṭanga thiam chuan eng subject pawh thil har lutuk a nih loh rualin, thiam bel erawh a ngai thu a sawi a, "Sorkarin Science leh Mathematics-te a ngaih pawimawh avangin heng subject bik zirtir tur hian zirtirtu ṭhahnem tak lak a tum a, recruitment rules leh ṭul dangte peih a ni tawh a, thil ṭul angte bawhzui mek a ni," a ti.

Education Minister chuan, tun hnaia sorkar laipui hotute nena an ṭhutkhawmnaah, New Education Policy chungchang an sawiho a, zirlaite fail theih loh tih leh board exam selection ngai lo anga sawite thlirho a nih thu sawiin, "No Retention Provision chungchang chu state sorkar thuneihna hnuaia dah rawt a ni," a ti a; exam-naa pass mai duhtâwk lo a, chhawr tlak ni tura thiam a ṭul thu a sawi.

Cash Award for Proficiency in Science & Mathematics hi Education department-in kum 1978-ah a pe ṭan a, Science & Mathematics subject-ah zirlaite'n tuina leh inelna thianghlim an neih theih nana tih niin, kum-ina an sem hi a ṭum 39-na a ni.

Award hi HSSLC leh HSLC exam bakah, pawl 9 leh 11 promotion examination-a Science wzleh Mathematics-a tiṭhate hnenah an pe ṭhin.

Nimina award semah hian HSSLC exam aṭangin zirlai 20, HSLC exam aṭangin zirlai 54, pawl 9 promotion exam aṭangin zirlai 57 leh pawl 11 promotion exam aṭangin zirlai 11 pek an ni a, an vaiin zirlai 142 an ni.