Naktukah Bru endik ṭan a ni dawn

Tripura refugee camp-a Bru-te Mizoram khua leh tui an nih leh nih loh enfiah hna chu naktuk hian thawh ṭan a ni dawn.

He mi chungchangah hian Mamit District Level Core Committe on Reang ( Bru) Repatriation chu an chairman Lalbiaksangi, Mamit DC hoin nimin khan an ṭhukhawm.

Meeting-ah hian, Bru lak lette dahna tur district pathum - Mamit, Kolasib leh Lunglei district tana liaison officer atana ruatte chu Bru-te endik hna thawhna tura thil pawimawh hrang hrangte hrilhfiah an ni.

Bru lak let turte Mizoram mi leh sa ngei an nih leh nih loh endik hna thawk tur hian Mizoram aṭanga identification team-te chuan vawiin hian Tripura refugee camp an pan dawn. Mizoram khua leh tui an nih leh nih loh finfiahna atan kum 1995 Mizoram electoral roll hman a ni dawn a, kum 1995 electoral roll-a hming chuang leh an thlahte chu Mizorama hruai kîr tum an ni ang.

Thu dawn danin, identification team-te hian vawiinah Mamit an chhuahsan ang a, Tripura-a an luh hmain Kanhmun-ah Tripura sorkar aiawhte nen hna thawh dan tur an sawiho leh phawt ang. Bru enfiahna hi November 2-ah Kaskau camp aṭangin ṭan a ni dawn a; Kaskau-ah hian Lunglei district-a dah turte an awm ve loh avangin Lunglei district
aṭanga identification team-te chu vawiinah an chhuak ve dawn lo.

State Level Coordination Committee on Bru Repatriation ruahman dan chuan, Kaukau camp-a mite hi November 4 thleng endik an ni dawn a; November 7-ah Khakchangpara-a mite endik tur niin, November 9-10 chhungin Hamsapara-a mite endik an ni ang. November 11-14 inkarah Asapara camp-ah, November 15-18 inkarah Naisingpara camp-ah leh, November 21-ah Hazachera camp-ah enfiah hna thawh tum a ni.