LRS dept. hnathawh dan sawiho

Serchhip District-a assistant settlement officer (ASO) Lalremruata Sailo leh Serchhipa thuthar thehdarhtute chuan, nimin khan ASO pisa-ah Land Revenue and Settlement (LRS) department hnathawh dan an sawiho.

Lalremruata Sailo chuan mipuiten in hmun lo ram; dan anga neih dan te, inhlan chhawn dan te, lei leh hralh chungchangte leh thil pawimawh dang an hriat chian tawk loh avangin harsatna an tawk
ṭhin tih sawiin, “Hei vang hian chanchinbumite hian in hmun lo ram chungchanga sorkar dan dinglaite hi chiang takin min hriat sakin, mipuite hrilhhriat kawngah a remchan dan ang zelin min ṭanpui se, mipuiten harsatna kan tawh tam tak hi sutkian a nih kan beisei,” a ti.

Serchhip district-ah cadastral survey fel tawh LSC, a neituten an la lakchhuah loh LSC 800 chuang a awm thu sawiin Lalremruata Sailo chuan, “Revenue danah chuan heng LSC te hi a neitute kuta a luh hma chu a neitute anga chhal theih an la ni lo. Chu bakah, an lakchhuah tlai avangin man tlawm taka khul theih reng kha a pung awmin an khul chhuah a ngai dawn a ni,” a ti a, LSC neitute chuan a rang lamin khul chhuak se an duh thu a sawi.

Inkawmhonaa thuthar thehdarhtute’n mipuiten kokim taka chhiah an pek theih nana hmalak dan tura rawtna an thlen chu kumthar aṭanga kalpui nghal a nih tur thu Serchhip ASO chuan a sawi.