Mi 449 hnena ram a pek danah Sorkarin tehfung a nei lo

Land Revenue & Settlement (LRS) department chuan tunlai hian Mualpui ram, Chite kama ram âwl (land bank) chu sorkarin pek tura a tihte hnenah an pe
ṭhin a; ram pek tur thlanna atan tehfung (criteria) siam a ni lo.

Vanglaini palai zawhna chhanga LRS department hotute sawi danin, Mualpuia ram âwl chu ṭhen sawmin, sorkarin ram pek tura a tihte hnenah pek ṭhin a ni. Tun dinhmunah ram pek tur thlanna atan hian criteria a awm lo. Ram ṭhen hrang hrang chu a zau zawng a inan loh avangin, sorkarin ram pek tura a tihte chu an ram tur pawhtir an ni.

Mualpui ramah hian mi 449 hnenah ram pek a ni tawh a, dilna lût la chinfel loh eng emaw zat a awm bawk. Dilna lut aṭangin sorkar chuan ram pek tur a thlang ṭhin a ni.

LRS department hotute chuan, V/C pass chu document atan hman tlak a nih loh thu Vanglaini an hrilh a, "V/C pass hi mi dang hnenah pek hnan theih a ni. V/C pass neite chuan an ram humhimna atan a rang thei ang bera periodic patta emaw, house site-ah emaw leh tur a ni. V/C pass rin ringawt chuan harsatna a awm thei a, mi tam tak an buai phah," an ti.

Revenue department hotute sawi danin, V/C-te'n pass an pek theih dan chu, notified town an nih hmain an huam chhungah house pass an pe thei a, thil dang atan an pe thei lo.

Stamp duty-a vendor an nih an hriat loh chungchang sawifiahin LRS department hotute chuan, "Stamp duty hi a hma chuan Law & Judicial department kutah a awm ṭhin a, kum 2013 aṭangin kan department-in kan khawih ṭan. Chuvang chuan, Law & Judicial department hian tute nge vendor atan an ruat kan hre lo a ni," an ti.

Vendor tur chu an ruat thar dawn tih sawiin LRS department hotute chuan, stamp duty dan thar hmanga chhiah lak tur suspend hian vendor tur ruat a dâl lo niin Vanglaini an hrilh.