Cement mistiri training buatsaih ṭan

Central YMA leh Mizoram Building & Other Construction Workers Welfare Board-te chuan, Skill Development Training (floor tile leh cement mistiri training) an buatsaih chu nimin khan Aizawl leh district hrang hrangah hawn a ni.

Skill Development Training hi Aizawlah chuan CYMA Hall-ah neih a ni a, Labour, Employment & Industrial Training secretary Benjamina'n a hawng. Benjamina bakah, CYMA president Lalbiak-zuala’n thu an sawi.

Aizawlah hian floor tile phah zirna buatsaih a ni a, mi 50-in an zir dawn a ni.

Lungleiah chuan mi 100 tan cement mistiri training buatsaih niin, Sub-Hqrs. YMA Conference Hall-ah Lunglei HPC vice chairman S Laldingliana, MLA-in a hawng a; CYMA finance secretary Lalrochuanga Pachuau-in a hmanpui.

Champhaiah pawh mi 100 tan cement mistiri training buatsaih tur niin, DC Vanlalngaihsaka'n a hawng a, CYMA aṭangin CEC member Jeffrey L Fanai-in a hmanpui.

Kolasib-ah chuan minister R Lalzirliana'n a hawng a, CYMA assistant secretary R Lalngheta pawhin a hmanpui.

Serchhipah DC Dr Lalrozama'n a hawng a, CYMA aṭangin vice president Vanlalruata'n a hmanpui.

Mamitah chuan SDO H Lalchhandami'n a hawng a, CYMA treasurer J Lalsailova'n a hmanpui bawk. District headquarters-ahte hian mi 100 zel training pek tur a ni.

Saitual, Darlawn leh Sateek-ahte pawh buatsaih a ni a, heng khuaahte hian mi 50 zel ṭraining pek an ni ang.