MNF-in Programme & Policy an ennawn

MNF Programme & Policy Drafting Committee member-te chu nimin khan Mizo Hnam Rûnah an chairman Dr R Lalthangliana, MNF vice president hoin an
ṭhukhawm a; MNF Prog-ramme & Policy tur duan chu peih thawkhat tawh mah se, enfel ngai la awm leh belh ngai la awmte siamṭhat leh ṭha an ti.

Meeting-ah hian, MNF party-in Socio-Economic Development Programme (SEDP) a duan tawh chu tichangtlungin, tunlai hmasawnna mil zawng leh Mizoram sik leh sá inthlak danglam dan azira ennawn a ni a; MNF Programme & Policy thar an duan chu sorkar laipui policy mil zawnga her remin, thil tam tak duan tel a ni tih an sawi.

MNF chuan, an Prog-ramme & Policy thar tur chu uluk leh fim-khur taka duan a ni tih sawiin, "Mi rethei leh kut hnathawktute tinzâwnin, eizawnna ngêlnghet siamsakna ‘economic activities for all,’ hmasawnna ruhrel lian tham siamna ‘macro-economic development’ leh mipui tana hna siam chhuahna ‘outsourcing policy’ te sorkar leh mimal/pawl thawhhona ṭha ‘public private partnership’ lam uarte leh ṭhalaite khawvel a nih angin, infiamna leh ṭhalaite hnathawh tur zawnsakte ngaih pawimawhah neih a ni ang," an ti.

SEDP hmangin kut hnathawktute din chhuahpui tham tur leh eizawnna ngêlnghet siamsak te, an hlawhtlin theih ngeina tura ṭan-puina leh an harsatna sutkiansakte chu ngaih pawimawh bik tur zinga mi a nih thu an sawi bawk.

MNF tarlan danin, Programme & Policy thar an duan chu peih a nih hunah MNF National Executive-ah pharh a ni ang a, pawm a nih hnuah, kum 2017 tìr lamah tlangzarh tum a ni.