KHAWTHLIR

Vawk vulhtute lawm

Aizawl Pig Breeder Association chuan thuchhuah siamin, Mizoram sorkarin NLUP third phase leh fourth phase hnuaiah vawktê a sem turah, Mizorama vawkpui vulhtute thar chhuah leisak tura ruahmanna a siam chu lawmawm an tih thu an tarang a, "Mizoram sorkar chung-ah lawmthu kan sawi tak meuh a ni," an ti a; vawktê hralhna hre lote chu Aizawl Pig Breeder Association-a inhriattir turin an chah.

Ganja man

Excise & Narcotics department-te chuan, nimin chawhma dar 11 khan Vaivakawn Zohnuaiah ganja kg. 15.3 leh an dahna thingrem leh suitcase an man a, a neitua puh, Vanbiakhleni (40) w/o Lalzoliana, Vaivakawn Zohnuai nia insawi an man bawk. Vanbiakhleni hi NDPS Act tlawhchhanin thubuai siamsak a ni.

Khelmual tifai

Thenzawl Sports Committee huaihawtin Thawhṭanni khan Thenzawla Loṭhazawl khelmual tihfai hnatlang neih a ni a, sport discipline hrang hrang hruaitute leh Thenzawla middle school leh primary school zirlai mi 700 vel an thawk chhuak. Khelmual chhung leh páwna hnimte an sâmfai bakah, pavillion leh a velte an tifai a ni.

Tlan khap

Traffic SP chuan thupek chhuahin, Salem Veng branch YMA-te ngenna ngaihtuah a nih hnuah mipuite kea kalte leh lirthei hmangtute him zawkna atan Venghnuai field bul aṭanga Dam Veng inkar kawngpuiah lirthei 407 truck aia lian chhuk leh chho zawnga tlan a khap. Thupek hian chhiatrupna kaihhnawiha lirthei veivak tur a huam lo.

Heroin man

Mizoram police-a Lunglei District Special Branch (DSB) chuan nimin khan Lungleiah Noor Ahmed hnen aṭangin heroin gram 14.5 an man. Heroin hi tual chhunga hralhna ang chuan Rs. 1,95,500 vel hû a ni.