April-September 2016 chhunga Mizoram IMR 17.87; MMR 95.17

Sorkar kum kal meka kum chanve, April-September 2016 chhung khan Mizorama nausen thi zat tehna, Infant Mortality Rate (IMR) zat chu 17.87 a ni a; nau chunga nu thi zat teh, Maternal Mortality (MMR) chu 95.17 a ni. IMR hi kum hmasa aia a hniam laiin, MMR chu kum hmasa aiin a sáng thung.

Nimin khan Aizawl Civil Hospital conference hall-ah kum chanve chhunga Reproductive and Child Health (RCH) leh National Health Mission (NHM) hnathawhte thlirletna hun hman a ni a; Health minister Lal Thanzara'n a hmanpui. He hunah hian April-September, 2016 chhunga dinhmunte tarlana sawiho a ni.

Sample Registration System (SRS) report-a a lan danin, kum 2013 aṭangin MIzoram IMR a tlahniam zel. Kum 2013-a IMR chu 35 (nausen 1,000 zelah 35 an thi tihna) a ni a, kum 2014-ah 32 a ni. Kum 2015-16 chhunga IMR chu 22 a ni tawh a, kum kal meka 2016-17 a kum chanve, April-September 2016 chhunga IMR chu 17.87 a ni.

MMR chu kum 2015-16 ah 88 (nu nau nei 1,00,000-ah 88 an thi tihna) a ni a; kum kal mek April-September 2016 chhunga IMT chu 95.17 a ni thung.

Damdawi-ina nau nei (institutional delivery) chu Mizoram pumah 2016-17 kum chanve chhungin 89% a ni. Damdawi-inah ngei nau hrin a nih theih nan hian scheme - Janani Suraksha Yojana (JSY) leh Janani Shi-shu Suraksha Karyakram (JSSK) te a awm a; chu'ngte chu mipuiah zirtir mek zel a ni.

Nu naupai zingah April-September 2016 chhunga thisen tlachham (anaemia) zat chu 54% an ni a; severe anaemia (a bika enkawl ngai khawp a thisen tlachham) HB level 7gm% aia hniam chu 1% an ni thung.

Meeting hi Health secretary Lalrinliana Fanai-in a kaihruai a; Health Minister chuan, thawktute ṭhahnemngaihna avangin nu leh naute hriselna lamah Mizoramin hma a sawn zel tih a sawi a, "Ṭan lakna lai tur erawh a la tam hle. Mahni district ṭheuhah chak leh ṭha zawka scheme hi kalpui a nih theih nan district officer-te'n ṭan la zawm zel se a duh-awm hle," a ti.

Lal Thanzara chuan, sorkarin dikna leh rinawmna a ngaih pawimawh thu sawiin, "Department hotu kan nih angin mi dang entawntlak ni turin, mahni mawhphurhnate rinawm taka hlen chhuah a pawimawh," a ti a; thawktute chu tunlai thiamna leh hriatnain an tlansan loh nan intuaithar zel turin a chah.

RCH/NHM review meeting-ah hian Health department leh NHM hmunpuia hotute leh district tinah hotute an tel a; Health principal director Dr K Ropari'n thu a sawi bakah, RCH state programme officer Dr Vanlalsawma'n district hrang hranga RCH hnathawhte a sawi. Meeting hi vawiinah chhunzawm leh a ni ang.