MSU-in General Conference an ṭan Vawiinah hruaitu thar thlang dawn

Mizo Students Union (MSU) chuan nimin khan Vanapa Hall-ah General Conference an hmang ṭan a, School Education minister H Rohluna'n a hmanpui.

School Education Minister chuan, mathematics leh science lamah ram pum huap tehna Mizoramin a phak loh cháng a awm fo tih sawiin, "Hei vang hian hma kan sawn theih nan mathematics leh science subject teacher lakna tur recruitment rules siam thar a ni. Middle school-ah science leh mathematics zirtirtu tur recruitment rules thar ang hian eng emaw zat lak a nih tawh a, high school-ah pawh zirtirtu 111 la tura hmalak mek a ni," a ti.

H Rohluna chuan, central service leh all India service-ah Mizoram
aṭangin ṭhalai tam zawk an tlin theih nan coaching centre-te buatsaih a nih thu a sawi a; chungte chu hman ṭangkai turin zirlaite a sáwm.

Khualzahawm Joseph Lalhimpuia, parliamentary secretary (Education) chuan, "Tunlai khawvel hi intihsiakna khawvel, a thei leh thiam apiang-te dinchhuahna a nih tawh avangin zirlaite'n awm mai mai lo a, rim tak leh taima taka theihtawp chhuah a, hlawh-tlinna hmu ngei tura theihtawp an chhuah a pawimawh," a ti.

MSU inkhawmpuiah hian Mizoram hmun hrang hrang aṭangin palai 600 chuang an tel a, vawiinah chhunzawm tur niin, kum 2016-18 chhunga hruaitu thar tur an thlan ang.