Lawngtlaia gas sem dan tur sawiho

Central YLA Kum-puan Committee hma-laknain, nimin khan CYLA hruai-tute leh Lawng-tlaia gas agent-te'n Lawng-tlaiah mumal taka gas sem a nih theih dan tur a sawiho. He hunah hian Lawngtlai District Consumers Protection Association hruaitute pawh an tel.

Meeting hi CYLA Kumpuan Committee chairman Zirliantluanga Tinthe-in a kaihruai a; tun hnaia gas sem dan leh mumal zawka gas sem theih dan turte an sawiho a ni.

CYLA hruaitute chuan, gas sem dan tura an duh dante an sawi a; chu'ngte chu tihhlawhtlin a nih theih nan theihtawp chhuah an tum thu gas agent-te'n an sawi.

Gas agent-te'n gas an sem ṭhin dante an sawi a; harsatna an tawhte leh mipui-te nawrna vanga agent
aṭanga hralh chhuah a ngaih ṭhin chhante an sawifiah.

Meeting-ah hian, mipui hnena gas sem dawnah gas man mipui hnena puanzar zel ni se an ti a; gas bûk tling ngei mipui hnenah pek ni se, tih te, gas thleng zat leh a rate mipui hriat theih tura tlangzarh zel ni se, an ti. Agency aṭangin black-a hralh chhuah loh ni se, tiin an rél bawk.

Tun dinhmunah Lawngtlaia gas agent-te'n consumers 9,436 an nei mek a, thla khatah truck phur 16 dawng tur an nih laiin, tunlaiah chuan phur 8-12 an dawng tlangpui a ni.