Kawng hrang hrangin sum kan dap zel ang - Zoramthanga

Chief minister Zoramthanga chuan nimin khan mipui hnena thuchah tichhuakin, Covid-19 dona atan sorkar, pâwl, mimal, kohhran, MLA, etc. ten theihtawp an chhuah mek thu a sawi a; sorkarn kawng hrang hranga sum a dap zel tur thu a sawi.

Chief Minister chuan, Covid-19 vanga Mizoram sor­karin budget aṭanga a sum sèn tawh chu cheng nuai sang tél a tling tawh nia sawiin, "He hri hian harsatna lian a thlen lohna atan engti kawng pawhin do kan tum a, kan inbuatsaih a ni. Sum kawng hrang hrangin kan dap zel ang," a ti a; mimal, pawl leh kohhrante chu Covid-19 dona atan CM Relief Fund-ah sum thawh zel turin a sáwm.

CM Zoramthanga chuan, sorkar chu miin dem duh se demna tur a awm tur thu sawiin, "Mipui sing tél thihna hripui kan do mek a, dam khawchhuah kan tum a ni. Keimahni leh keimahni insawisel a hun lo. Theihtawpa inṭawiawma kan ṭan khawm a ṭul," a ti a; Pathian ṭanpuinain Covid-19 chu Mizoramin a do hneh ngei a rin thu a sawi.

Covid-19 chuan khawvel, India leh Mizoram economy a nghawng dan tur hriat theih a la nih loh thu sawiin Zoramthanga chuan, "Min tihchhiat lohna atan theihtawpin ṭan la ila. Kan economy a chhe palh a nih pawhin Mizoram kan vanneihna chu bul ṭan lehna tur ram ṭha tak kan nei. State dang hetiang nei ve lote ai chuan bul kan ṭan ṭha zawk ang," a ti.

Chief Minister chuan, Covid-19 dona atan mimal, pawl leh kohhrante'n CM Relief Fund-ah sum an thawh khawm thu sawiin, "CM Relief Fund hi a hman dan tur ngaihtuahtu tur Chief Secretary kaihhruai committee din a ni a, anni hian uluk takin an ngaihtuah a ni," a ti a; Covid-19 kaihhnawihah CM Relief Fund cheng nuai 457 chuang hman a nih tawh thu a sawi.

Covid-19 kaihhnawihah CM Relief Fund chauh hman a nih loh thu sawiin CM Zorama chuan, "Account leh head hrang hrangte pawh khâwm a ni. Kan budget 

aṭanga Health department hman tura kan pek tawh ringawt pawh cheng nuai 1,515 chuang a ni," a ti.

Zoramthanga chuan, a hautak ber chu supply lam a nih thu sawiin, "Mipuite'n ei tur an neih theihna atan a awm ang ang hmang ang kan ti a ni. Phurh man a to bakah, loading leh unloading pawh a buaithlak hle. Guwahati-ah harsatna a awm avangin West Bengal-a mite lâk a ni a, transportation cost a to phah hle," a ti a, supply atan Mizoram budget aṭangin cheng nuai 3,000 chuang hman a nih tawh thu a sawi.

Chief Minister sawi danin, Mizoram House-a tangkhangte chu a thlàwna awmtir an nih bakah, chaw ei man nei lote chu a thlawna eitir an ni. Mizoramah state dang mi tangkhang mi 1,748 vel an awm a, chu'ng mite chu Mizoram sorkarin an ei leh in tur a ngaihtuahsak ve thung.

State danga Mizo tangkhangte an awmna state thuneitute hnenah lo buaipui tura tih a nih angin an buaipui a, mahse, chu ringawt chuan harsatna a sutkian zawh loh avangin CM Relief Fund aṭangin cheng nuai 158.36 chu state hrang hranga Mizo tangkhangte tan dah a ni. Myanmar-a Chin mi Delhi-a tangkhangte tan Rs. 5,00,000 ruahman a ni bawk.

LESDE department aṭangin Covid-19 dona atan sum hman theih tur dap a ni a, cheng vbc. 21.2 hman tura tih a ni. MGNREGS hnuaiah Central-in January-March inhlawhna a bat chu nasa taka nawr a nih hnuah vbc. 520 a pe chhuak a, hna thawktute account-ah thun deuh vek a ni tawh.

•Covid-19 vanga kan economy a chhe palh a nih pawhin bul ṭan lehna tur ram ṭha tak kan nei.

•Covid-19 kaihhnawihah CM Relief Fund cheng nuai 457 chuang hman a ni tawh.

•Covid-19 vangin kan budget aṭangin cheng nuai sang tél kan hmang tawh.

•Myanmar-a Chin unau Delhi-a tangkhangte tan Rs. 5,00,000 ruahman a ni.

•Covid-19 vanga harsatna lian a thlen loh nan engti kawng pawha do turin kan inbuatsaih.