Khawtlangin ṭanpuina an pe

Covid-19 laka invênna atana ramria duty-te leh inkhârkhip vanga mipuiin harsatna an tawh loh nan khawpui leh thingtlanga khawtlangte chu ṭanpuina pein an che chhuak mek zel.

Phulpui khawtlang chuan an khaw mite thlai leh kurtai tharte chu nimin khan Aizawla hmun ṭhenkhatah an pe a; Langkaih lui kam ramri hrûla Mizoram vengtute pek turin Mizoram police DIG (Northern Range) Lalbiakthanga Khiangte hnenah kurtai kg. 100 an hlân a, Aizawla Salem Veng khawtlang tan kurtai kg. 270 leh thlai eng emaw zat an pe bawk.

Kolasib district-a V/C-te chuan an thla khat lawmman an thawh khawm Rs. 2,27,400 chu Assam leh Mizoram ramria task force 18-te tan nimin khan an hlân. Kolasib district-ah hian V/C 52-ah member 140 an awm a ni.

Ramhlun South Branch YMA chuan April 20-22 chhung khan ramri dep khaw ṭhen­khat - Saiphai, Phaisen, Buhchangphai leh Vai­rengte khuaa ramri vengtu duty-te post hrang hrang tlawhin, ṭanpuina sum ṭhahnem tak an hlân.