KHAWTHLIR

Mumbai-a Mizo damlo enkawl zinga Covid-19 vei an hmuh chhuah hmasak ber, April 13-a positive tih an hriat chu tun hnaia ṭum hnih an test nawnnaah a negative ve ve tih hmuhchhuah a ni. Mumbai aṭanga thudawn danin Covid-19 enkawlna hmun aṭangin an chhuahtir a, Mumbai-a Salvation Army guest house Red Shield-ah a awm ang.

Aizawl Civil Hospital (ACH) Medical Superintendent chuan thuchhuah siamin, "OPD-ah hian natna serious lêm lo kal kan la ṭhahnem hle a, mipui leh thawktute him zawk nan a ṭul zualte chauh kal turin kan inngen nawn leh a ni," a ti a; damdawi-ina kalte chu social distancing, kut sil, hand sanitizer, hmai tuamnate hmang ngei turin a chah.

Ṭhalai Kristian Pawl (ṬKP), Ramhlun South unit chuan AVBD ngenna chhángin nimin khan Aizawl Civil Hospital-ah thisen unit 20 an pe a, petute mipa 17 leh hmeichhia pathum an ni. Individual donor mi pathumin an pe bawk. Kolasib Venglai Branch YMA Neuva Section pawhin nimin khan Kolasib District Hospital-ah thisen unit 14 an pe a, petute mipa 12 leh hmeichhia pahnih an ni.

Indian Medical Association (IMA)-in nizan dar 9-a India ram puma White Alert Protest huaihawt an tum chu ṭhulh a nih thu, IMA Mizoram State Branch chuan an tarlang. White Alert hi doctor-te leh health care worker dangte chunga tharum thawh duh loh lantirna atana buatsaih tum a ni a; an thil phût - healthcare worker-te venhimna leh kutthlakte chunga hremna dan (ordinance) sorkar laipuiin a siam tâk avangin nimin chhun khan White Alert huaihawt tur chu an ṭhulh ve nghal a ni.

Covid-19 donaa hman turin Thawhlehni tlai dar 3 leh nimin tlai dar 3 inkar khan Chief Minister's Relief Fund-ah Rs. 11,91,130 chhûn luh a ni a, sum lut tawh zawng zawng chu nuai 610 a tling tawh. Nimina sum lut zingah hian UDPA enkawltu deputy chief minister Tawnluia leh department-a thawkte thawh khawm Rs. 10,00,000 a tel a ni.