Bru enfiah hna thawh ṭan a ni Kaskau-ah Bru-te an inlan ṭha

Mizoram aṭanga Tripura-a ráltlân Bru-te Mizorama lak letna turin nimin aṭang khan Kaskau camp-ah Mizoram Bru-te enfiah hna thawh ṭan a ni a; Mizoram khua leh tui nia insawi chhungkaw 90 chuang an inlan.

Bru lak let leh endik hna thawh mek hi sorkar laipuia Ministry of Home Affairs (MHA) thupek ang leh, State Level Coordination Committee on Bru Repatriation ruahman anga kalpui a ni.

Home department-a additional secretary Lalbiakzama'n Vanglaini palai zawhna chhanga a sawi danin, nimina Mizoram Bru-te enfiahnaah hian Bru chhungkua 100 dawn lai an inlan a; buaina leh harsatna awm loin tluang taka kalpui a ni a, vawiinah chhunzawm a ni ang a, naktukah zawh a ni ang. Kaskau camp-ah hian voter mi 1,147 an awm.

November 7-ah Khakchangpara camp-a mite endik tum a ni a, November 9-10 chhungin Hamsapara-a mite endik an ni ang. November 11-14 inkarah Asapara camp-ah, November 15-18 inkarah Naisingpara camp-ah leh, November 21-ah Hazachera camp-ah enfiah hna thawh tum a ni.

Bru endik tura kalte hi MCS officer-te an ni a, Mamit additional DC H Lianzela'n a ho. Kal dangte chu - Transport deputy director Lalhmansanga, Aizawl ASO K Zorammuana, Champhai SDC Beitlotha Nohro, Lawngtlai SDC Dr Andrew Lalremruata, Serchhip SDC Neng Thianlala, Lawngtlai SDC Dr Manesia Khaimeichho, Kolasib SDC Lalrinawma Khiangte, Siaha SDC Ngurthansanga, Mamit SDC Gaston Vanlalhriatpuia leh Mamit SDC Vanlalhmachhuana-te an ni.

Bru endik hna thawk tura kalte chu November 1, 2016 khan Damcherra BDO conference hall-ah Mamit additional DC H Lianzela kaihhruaiin Tripura sorkar official-te nen an ṭhukhawm a; Bru lâk lêt thawh riatna kalpui dan tur leh chumi hmaa endik hna thawh dan tura ruahmanna awmte an sawiho.

H Lianzela chuan, Mizoram sorkar official-te leh Tripura sorkar official-te inpawh tlang taka Bru lak let tura an thawkho chu lawmawm a tih thu a sawi. Tripura sorkara Panisagar SDM pawhin, Mizoram official-te'n an mamawh ang chu theihtawp chhuaha an thawhpui tur thu leh, Bru endikna thawh tura thil ṭul hrang hrangah inbuatsaihna peih a nih tawh thu a sawi.

Bru lak let turte Mizoram mi leh sa ngei an nih leh nih loh endik hna thawk tur hian Mizoram aṭanga identification team-te chuan November 1, 2016 khan Tripura an pan. Endikna hmasa ber tur, Kaskau camp-ah Lunglei district-a dah turte an awm ve loh avangin Lunglei district aṭanga identification team-te an la kal ve lo a, naktukah an kal dawn nia thu dawn a ni.

Mizoram khua leh tui an nih leh nih loh finfiahna atan kum 1995 Mizoram electoral roll hman a ni dawn a, kum 1995 electoral roll-a hming chuang leh an thlahte chu Mizorama hruai kîr tum an ni a; tun November thla tawp lamah lak let
ṭan tum a ni.