Sumdawnna tlân theih hun kum bithliah Sût turin MNF-in Chief Minister an ngen

MNF party Vigilance department chuan, sumdawnna lirtheite tlân theih hun sorkarin a bithliah sût ngenna nimin khan Chief Minister's Office-ah an thehlut.

MNF party chuan, commercial vehicle replacement chungchanga sorkar notification no. F.20016/4/2016-DTE (STA) VOL-IV Dated 15th. September, 2016 chu lirthei neitute eizawnna chhut chahna tura an ngaih avangin sût tura ngenna Chief Minister hnenah an thehlut tih an sawi.

July 26, 2016-a State Transport Authority meeting thurel angin Transport department chuan September 15, 2016-ah notification a tichhuak a; chutah chuan sumdawnna lirtheite an kum zat azirin thlak tura tih a ni. Tourist bus-ah riat, tourist taxi-ah kua, two wheeler taxi, auto-rickshaw, local taxi, maxicab leh city/town/bazar bus-te chu kum 10-ah bithliah a ni.

Kum bithliah chin a tlin tawh chuan sumdawnna lirtheite chu a thara thlak ngei ngei a ngai a; hriattirna chhuah ni, September 15, 2016 aṭanga chhiara thla ruk chhunga motor thara thlak lote chu an permit tihtawpsak tura tih a nih thu leh, bus bik chu thla riat hun pek a nih thu MNF-te chuan an tarlang.

MNF party chuan, sumdawnna lirthei chu eng anga la ṭha pawh niin, MVI mit la tlung viau mah se, sorkar hun bithliah kum an tlin tawh chuan a thara thlak ngei ngei a ngai dawn tih sawiin, "Hei hi nunràwn thlak kan ti a, lirtheia eizawngte tan phurrit nasa tak nia kan hriat avangin sût leh ngei turin sorkar kan ngen a ni," an ti a; sorkar bawhzui dan an thlir reng dawn thu an sawi bawk.