Mizoram sum dinhmun sawifiah

Finance department chuan thuchhuah siamin, Mizoram sorkarin thawh chhuah (own revenue receipt) a neih tam loh avangin overdraft a thlen loh nan fimkhur taka sum neih angte enkawl a ngaih thu a tarlang a, "Chumi tur chuan Reserve Bank of India (RBI)-a kan sum a taka awm zat mil zela bill hrang hrangte release a ngai ṭhin," an ti.

K-Desposit-a sum dah tam chu sum neih tam tehna atan hman chi a ni lo tih tarlangin Finance department chuan, "Leiba tam tak neihna zawk a ni. Mizoram sorkar sum chet vel dan (accounts) enkawltu ber Accountant General, Mizoram chuan K-Deposit hi sorkar leiba angin a record a, chuvangin, sorkar leiba pawh a san phah reng
ṭhin," an ti a; K-Deposit-ah sum dah a tam poh leh sorkarin a bill pek chhuah leh tur (liability) a tam tihna a nih thu an sawi.

Finance department tarlan danin, K-Deposit-a sum dah a san telh telh (sorkar leiba a tam telh telh tihna) laiin, Mizoram sorkar chuan sum harsatna tihziaawm nan chi hrang hrangin hma a la a; sum leh pai lama inrenchemna tur khauh takin a kalpui a, a theih chin chinah sum lak luhna tipung turin chhiah leh fee-te mipui phurrit lutuk lo turin a tipung ṭhin.

Sum leh paia Mizoram dinhmun sawhnghehna turin kum 2015-16 leh 2016-17 hian Years of Consolidation kalpui a ni a; hengte vang hian K-Deposit-a sum dah pawh a tlahniam a, chu chuan sorkar leiba a tihniam zel a ni.

Kum 2015-16 bikah, April 2015-a K-Deposit-a Mizoram sum awm zat chu cheng vbc. 1602.34 a ni a, chu chu April 2016-ah chuan cheng vbc. 571.85 crore vela tlahniam hman tura chhût a ni tih tarlangin Finance chuan, "Hei hian a entir chu, sorkarin sum hi ṭha tak leh uluk takin a enkawl a, sorkar leibate pawh vawi leh khatah titla-hniam duak thei lo mah se, zawi zawiin a tla-hniam zel tihna a ni," an ti.