KHAWTHLIR

Fast Track Court hawng

Thubuai rang zawk leh chak zawka chinfel a nih theihna tura ruahman, Fast Track Court, Kolasib chu nimin khan Gauhati High Court judge Michael Zothankhuma'n a hawng. Michael Zothankhuma chuan, Kolasib mipuite chu pawi khawihtute'n an phu tâwk hremna an hmuh a, dik taka rorel a nih theih nan Court thuneitute thlawp ṭha tur leh thuhretua ṭang hreh lo tur leh ṭang taima turin a chah.

MSU hruaitu

Mizo Student Union (MSU) chuan nimin khan Vanapa Hall-ah General Conference an hman chhunzawm a, kum 2016-18 chhunga an office bearer turte an thlang. MSU president atan RB Lalmalsawma thlan a ni a, general secretary atan Lalthanzuala thlan a ni.

SEC lawm

State Election Commission chuan thuchhuah siamin, Dawrpui Vengthar local council by-election October 31, 2016 a buatsaih inthlan tluang tak leh hlawhtling taka a neih a nih theihna atan thawktu zawng zawngte hnenah an lawm thu an tarlang.

Motor-in chíl hlum

Lalengmawia (29) h/o Zothani, Kolasib Ṭumpui chu November 1, 2016 zing dar 9:45 khan Bairabi panna kawnga Zero Point bulah buhfai phur truck MZ-04 9500-in a chíl a, Kolasib District Hospital thlenpui a nih hnuah a hliam tuar loin chawhma dar 11:20-ah a thi. Lalengmawia chíltu truck hi mi a chíl tih hre loin a tlan tlang avangin ûmzui a ni a, a khalhtu Danny Lalchhuanawma s/o Mitinkhuma, Ruantlang chu man niin, Kolasib Police hnenah hlan a ni.