Vigilance Awareness Week hmang

BSNL bultumin November 1, 2016 khan T Romana College-ah Vigilance Awareness Week pualin hun hman a ni a; Anti Corruption Bureau (ACB) director LH Shanliana'n a hmanpui.

Vigilance Awareness Week hi Central Vigilance Commission thupek angin India ramah October 31 aṭanga November 5, 2016 chhung hman tur a ni a; kumina thupui chu, 'Public participation in promoting integrity and eradicating corruption' tih a ni.

LH Shanliana chuan, Central Vigilance Commission chu kum 1964-ah din a nih thu leh tun dinhmuna Mizorama ACB dinhmun tlangpuite a sawi a; BSNL leh T Romana College-in Vigilance Awareness Week puala programme an buatsaih chu lawmawm a tih thu a sawi.

ACB Director chuan, sorkar laipui leh state tinah sorkar hmasawnna scheme hrang hrangte a hlawhtlin a, ram leh mipui náwlpuiin hma an sawn theihna turin mipui náwlpuiin rinawmna an tun din a ṭul thu a sawi a, "Corruption do kawngah thâ kan thawh ṭheuh a ṭul a, chutiang tura mipui zirtira tihbengvar hi Vigilance Awareness Week-in a tum a ni," a ti a; eirukna do kawnga tha thawh turin zirtirtu leh zirlaite a sáwm.

Shanliana chuan, khawvel ram dang leh India rama corruption lian ṭhenkhatte a sawi lang a; kum 1952-a India rama corruption lian ber chu cheng nuai 52 a nih laiin, TV report-a July 14, 2013-ah chuan kum 2012 chhunga ram puma thamna sum belhkhawm chu cheng vbc. 6,29,657 vela chhût a ni tih a sawi.

ACB director sawi danin, ACB hi kum 1976-ah din niin, IGP hnuaiah SP-in a ho ṭhin a, kum 1981 aṭangin Vigilance department hnuaiah awmin, Chief Vigilance Officer (Chief Secretary) hnuaiah a awm. Kum 2008-ah Anti Corruption Branch tih ṭhin chu Anti Corruption Bureau tia thlak a ni a, kum 2009-ah Director (IGP rank) post leh post dang siam belha tihlen a ni.