CM Hawla'n Chavang Kût a hmanpui

November 1, 2016 khan Tuibong, Churachandpur-a Peace Ground-ah Chavang Kut 2016 (Celebration of Brotherhood) hman a ni a, chief minister Lal Thanhawla'n a hmanpui.

Chief Minister chuan, Kumpinu sorkarin Zo hnah-thlakte chu ram pathum - India, Myanmar leh Bang-ladesh-ahte a ṭhendarh tih sawiin, "Min ṭhendarh mai ni loin, India ramah pawh Mizoram, Manipur, Assam leh Tripura-ahte min ṭhendarh leh a, mahse, hei vang hian tute mah beidawng tur kan ni lo. Kan awmna hmun leh kan awmna sorkarah ṭheuh rinawm takin, ram leilung fa leh neitu nihna chan changin, kan dikna leh chanvo te humhalh chunga kan awm a pawimawh," a ti.

Zo hnahtlakte chenna ram chin chu khawvela sa-khaw lian pathum - Hindu, Buddhist leh Muslim sakhaw vuantute'n an hual tih sawiin Lal Thanhawla chuan, "Pathianin Chanchin Ṭha hmanga min zawng chhuak leh hun rei lo têa ringtua min siam vekte hi thil mak danglam tak a ni. Hei hian Pathian lakah Zo hnahthlakte kan special zia a tilangin ka hria," a ti.

Pathianin Zo hnahthlakte a zawn chhuah chhan chu Chanchin Ṭha hrila khawvela rah chhuak turin a ni tih sawiin, engtikah emaw chuan Zo hnahtlak ram luah chin chu independent ramah Pathianin a dah lo ang tih sawi theih a nih loh thu a sawi.

Chief Minister chuan, Chavang Kût mikhual a ni lo tih sawiin, "Zo hnahthlak tute mah hi Zo hnahthlakte Jeruasalem - Mizoramah in mikhual bik lo. Nangni leh keini ina kan sorkar tih theih chu Mizorama kan rorelna hi a ni a, Zo hnahtlakte inpum-khatna atan nu leh pa chan changin, tling lo takin kan theihna chinah hma kan la zel a ni. Mizoram páwna Zo hnahtlakte thawhrimna leh taimakna vanga sorkar nghêng lo leh rinchhan loa in ding hi in entawn tlak hle," a ti.

Chavang Kût hian ni thum chhung a awh a, October 30, 31 leh November 1-ahte neih a ni a; Zo hnahthlak hrang hrangte bakah, India hmarchhaka hnam hrang hrangte pualin hun buatsaih a ni.