Buhfai chungchangah hmalak thu puang

Food, Civil Supplies & Consumer Affairs (FCSCA) department chuan thuchhuah siamin, Mizoram mipuite’n ei leh bâr tur him tak leh hnianghnâr taka an neih zel theih nan hma an la zel tih an tarlang.

FCSCA thuchhuah chuan, "Sorkarin a agency hrang hrangte aṭanga buhfai a leinaah, mipui ei atana him tâwk loa ngaihte chu hnâwl mai a ni ṭhin a, tun thleng hian ration buhfai ṭha lo ei vanga hriselnain a tawrh phah thu dawn a la ni lo," a ti.

Supply department chuan, tun hnaia chanchinbu leh news media ṭhenkhatah sorkar supplier buhfai tihchingpen lai man a nih thu tarlan chungchang sawiin, mipuite an thlabâr phah chu pawi an tih thu an tarlang a; he thilah hian chî-âina tur a awm lo niin an sawi.

Tun hnaia media-a lang, buhfai tih-chingpen nia sawi chu sorkar buhfai a ni loa sawiin, Supply department chuan, "Tun dinhmunah buhfai a tam tâwk avangin FCI aṭang lo chuan lei belh tumna pawh a la awm rih lo," an ti a; buhfai chu free item a nih avangin, mi tu pawhin sumdawn nan an hmang thei a, buhfai vàn lai a nih loh chuan FCSCA a inrawlh ngai lo niin an tarlang.

FCSCA department chuan, tun din-hmunah Food Corporation of India (FCI) leh MIZOFED Ltd.-te bak mimal emaw, supplier dang emaw an nei lo tih sawiin, "MIZOFED hnena sorkarin buhfai supply order a pek hnuhnung ber chu September 30, 2016 khan MIZOFED-in an rawn dah kim vek tawh. Hei bak hi supply order pek leh a la awm lo," a ti.