CM leh sipai hotu inkâwm

Assam Regiment-a hmarchhak bial enkawltu, deputy director general (Recruiting) Brig. Sanjeev Nagpal chuan Thawhlehni tlai khan chief minister Lal Thanhawla a chenna inah a kâwm a; Mizo ṭhalai tam zawk sipaiah an luh theih dan tur an sawi dûn.

Chief Minister chuan, rambuai hmain Mizo tam tak Assam Regiment leh sipai unit dangahte an luh tawh ṭhin thu sawiin, "Rambuai chho leh a hnu rei fé thleng ṭhalai tam takin sipai lam an hawi lo. Mahse, remna leh muanna awm hnu chuan he lam hi ṭhalaite'n hawi tawhin, tunah chuan Mizo ṭhalai sang fé chu sipaiah an ṭang mek a ni," a ti.

Brig. Nagpal chuan, Mizo ṭhalaite chu sipai ṭha tak an nih thu sawiin, "Hotute an zah thiamin an huaisen a ni," a ti a; Mizo ṭhalai tam thei ang ber sipaiah an tlin theih nan theihtawp a chhuah tur thu Chief Minister a hrilh.