Police kutthlâk thubuai chhui mek
Mizoram Police chuan, April 18, 2020 tlai lama Thaidawr leh Zomuantlang inkara New Kawnpuia Covid-19 vanga ramri vên hna thawktu IR police pahnih kutthlâk thubuai chu chak taka bawhzui mek a nih thu an tarlang.
Police thuchhuah chuan, thil thlen dan chiang leh zuala chhui turin Director Genereal of Police thu angin High Level Enquiry din a ni a, Enquiry report chu nimin aia tlai loa thehluh tura tih a ni. Thil thlen hnuah New Kawnpui border outpost-ah hian armed police company khat, assistant commandant hoin dah belh a ni tawh a, MRP pawh a ṭul ang zela dah tura tih a ni.
Pawi khawihtua puh man tawhte chu Kanchanpur Sub-Divisional Judicial Magistrate Court-ah an inlan tawh a, Court chuan, pawi khawihtua puhte Mizoram lama lak dilna (transit remand) chu a hnawl a, mi mante pawh bail-in a chhuahtir.
Police thuchhuah chuan, Kanchanpur Judicial Magistrate thutlukna chu court sang zawkah appeal tura bawhzui mek a nih thu tarlangin, dan ang zelin a theih ang angin chak taka an chhui zui zel dawn thu leh, he thubuai avang hian Mizoram police chuan hmun danga an hna pangngai - ramri vèn, quarantine centre security duty, law & order duty, etc. te tiṭhuanawp chuang loin chak taka hma an lak zel thu a tarlang bawk.