Inkharkhip vangin MULCO bawnghnute a tlêm

Mizoram Milk Producers' Cooperative Union (MULCO) chuan Covid-19 vanga inkhâr­khip chhungin bawnghnute an siam chhuah zat chu nunphung pangngai laia an siam chhuah ṭhin aiin 25% - 30% velin a tlahniam. Bawnghnute semte chu inkhàrkhipin huam ve lo mah se, Aizawl veng ṭhenkhatah chuan local task force-te'n an vengah bawnghnute pek an phal lo.

MULCO managing director Dr Dailoa David Varte chuan, MULCO-in hnathawh châwl lo mah se, Covid-19 vanga inkhâr­khipin bawnghnute siam chhuah kawngah nasa takin nghawng a nei tih Vanglaini palai a hrilh a, "Bawng chaw ṭha hmuh tur a awm mumal lo a, a tam zawk hi phai lam aṭanga kan lak luhte a nih avangin lockdown hian a tikhaihlak nasa hle," a ti.

Dr Dailoa David Varte chuan, bawnghnute chu primary society 32 aṭangin zing tin MULCO leh mimal lirtheiin lâk khawm ṭhin a nih thu sawiin, Covid-19 lèn hmain a tlangpuiin tûk khatah litre 6,500 vel an lak khawm ṭhin laiin, April 1-14 chhung khan chawhrualin ni khatah litre 4,741 vel an hmuh thu a sawi.

MULCO Managing Director chuan, kum dangah chuan ṭhál lai hi bawnghnute hralh vanglai a ni ṭhin tih a sawi a, "Kum dangah chuan ni khatah litre 6,384-te kan hralh a, kuminah chuan litre 4,089 kan hralh pha chauh a ni," a ti. Bawnghnute semte chu lockdown-in a huam loh avangin Aizawl DC aṭangin MULCO zawrh phalna an hmuh vek tawh thu a sawi rualin, "Veng ṭhenkhatah chuan local task force-te'n an vengah zawrh an phal lo. Mipui aṭanga demand erawh a tam hle," a ti.

Bawng chaw (wheat bran, cencentrated feeds) lâk khawm chungchangah duhkhawp an hmuh loh thu MULCO hotute chuan sawiin, "Kan mamawh ang kan hmuh theih loh avang­in bawnghnute siam chhuah kawng­ah harsatna kan tâwk," an ti a; khaw ṭhenkhatah task force-te'n bawng chaw pek an remti lote chu pawi an tih thu an sawi.

MULCO hi Aizawl khawpui chhung bakah Sairangah an thawn mek a, hmun dangah erawh chuan lirthei tlân a remchan loh avangin an pe chhuak rih lo. Bawnghnute funna polyfilm chu industry/factory-te khâr a nih avangin May thla daih tur pawh an nei mumal tawh loh avangin an mamawh tur ang chu AH&Vety department-ah an thlen tawh a ni.